Búgin, 16-iyul kúni 2024-2025-oqıw jılında joqarı hám professional bilimlendiriw mákemelerine oqıwǵa kiriw test sınaqlarınıń úshinshi kúni baslandı.

Ájiniyaz atındaǵı Nókis mámleketlik pedagogikalıq institutı tárepinen Respublikalıq oyın túrleri hám jeńil atletika boyınsha qánigelestirilgen balalar hám jas óspirimler sport mektebinde ótkerilip atırǵan test sınaqlarında qatnasatuǵın abiturientler hám olardıń ata-anaları ushın kútiw orınları, test procesin onlayn baqlaw imkaniyatı, sonday-aq, basqa da zárúr sharayatlar jaratıldı.

Qaraqalpaqstan Respublikası Pedagoglardı jańa metodikalarǵa úyretiw milliy orayınıń direktorı Bekmurza Dilanov hám institut rektorı wazıypasın waqıtsha atqarıwshısı Quvondiq Qodirov abiturientlerdiń ata-anaları menen sáwbetlesip, olardıń perzentlerine test sınaqlarında áwmetler tiledi.

Esletip ótemiz, test sınaqları kúnine eki smenada –
1-smena 08:00 den 11:00 ge shekem, al 2-smena 15:00 den 18:00 ge shekem bolıp ótedi.

Qaraqalpaqstan Respublikasında joqarı hám professional bilimlendiriw mákemelerine oqıwǵa kiriw test sınaqları usı jıldıń 25-iyul kúnine shekem dawam etedi.

Test sınaqları tolıq videobaqlaw arqalı onlayn translyaciya etilmekte hám processti test2024.uz saytı arqalı onlayn baqlap barıw imkaniyatı jaratılǵan.

NMPI baspasóz xızmeti.