Aldın xabar bergenimizdey, paytaxtımız Nókis qalasındaǵı Ashshıkól aymaǵındaǵı «Qaraqalpaq awılı» demalıs ornında Qaraqalpaqstan Respublikası Joqarı bilimlendiriw, ilim hám innovaciyalar ministrligi baslaması menen respublikamızdaǵı joqarı oqıw orınlarınıń studentleri arasında birinshi márte «Studentler jazǵı lageri» shólkemlestirilgen edi.

Házirgi waqıtta bul jerde respublikamızda jumıs alıp barıp atırǵan barlıq joqarı oqıw orınlarınan 150 ge shamalas jaslar jazǵı demalıs waqtın mazmunlı ótkermekte.

Ájiniyaz atındaǵı Nókis mámleketlik pedagogikalıq institutı jámááti usı lagerde jaslardıń bos waqıtların mazmunlı ótkeriw maqsetinde birqatar mádeniy-kewilashar, intellektual-aǵartıwshılıq hám sport ilajların shólkemlestirdi.

Atap aytqanda, qaraqalpaq xalıq naqıl-maqallarınan viktorinalıq sorawlar, «Zakovat», «Erudit-kvartet» intellektual oyınları, badminton, stol tennisi, arqanda sekiriw sport jarısları, psixologiyalıq treningler, súwretlew óneri boyınsha tańlawlarda jaslar ózleriniń sheberliklerin kórsetiw menen birge óz ara bilim-kónlikpe almastı.

– Bunday ilajlardı ótkeriwden baslı maqsetimiz student-jaslar arasında tálim-tárbiya sistemasın jetilistiriw bolıp tabıladı, – deydi NMPI jaslar jetekshisi Bayrambay Gúlimbetov.

Ilaj sońında institut rektorı wazıypasın waqıtsha atqarıwshısı Quvondiq Qodirov sózge shıǵıp, «Úshinshi Renessansqa qaray» principi menen «Ilimdi qádirleń, ilimge umtılıń!» súreni tiykarında ótkerilip atırǵan jazǵı lagerdiń shólkemlestiriliwi, onıń áhmiyeti haqqında aytıp ótti hám belsene qatnasqan barlıq jaslarǵa minnetdarshılıq bildirip, diplom hám estelik sawǵalardı tapsırdı.

NMPI baspasóz xızmeti.