Studentlerdi turaq jay menen támiyinlewde náwbetlerdiń aldın alıw, oqıw jılı baslanıwı qarsańında studentlerdiń turaq jaysız qalıwı jaǵdayların boldırmaw maqsetinde Ájiniyaz atındaǵı Nókis mámleketlik pedagogikalıq institutında 4 orında arnawlı oraylardıń jumısları jolǵa qoyıldı.

Bul oraylarda instituttıń studentlerdi turaq jay menen támiyinlew jumısların muwapıqlastırıw bóliminiń qánigeleri hám volontyorlar tárepinen turaq jayǵa mútáj bolǵan studentlerdi jataqxana hám ijara úyleri menen támiyinlew boyınsha ámeliy járdem berilmekte.

Institutta jańa oqıw jılı aldınan Nókis qalasında student-qızlar ushın 576 orınlıq, er studentler ushın 93 orınlıq, Ellikqala rayonında 225 orınlıq studentler turaq jayları tayar halǵa keltirildi.

Sonday-aq, mámleketlik-jeke sheriklik tiykarında úsh orında – 100, 400 hám 362 orınlıq studentler turaq jayları jańa oqıw jılına studentlerdi qabıllamaqta.

Sonıń menen birge, institut átirapındaǵı máhállelerden 198 ijara úyiniń sharayatları úyrenilip, jańa oqıw jılına tayarlap qoyılǵan.

Maǵlıwmat ornında atap ótiw orınlı, Ministrler Kabinetiniń 2023-jıl 14-avgusttaǵı 376-sanlı qararı tiykarında tastıyıqlanǵan reglamentke muwapıq 1-avgusttan baslap studentler arzaların my.gov.uz portalı arqalı jiberiwi múmkin.

Reglament tiykarında dáslep jeńillik hám ústemlikke iye talabanlar studentler turaq jaylarına qabıllanadı.

Bunnan soń ulıwma dizimdegi studentler ushın jataqxanada awısqan orınlar sanına salıstırǵanda náwbet tiykarında tómendegishe bólistiriledi:

1-kurs studentleri ushın 55-65 procent;
2-kurs studentleri ushın 15-20 procent;
3-kurs hám onnan joqarı kurs studentleri ushın 20-25 procentke shekem ajıratıladı.

Arzalardı qabıllaw 1-avgusttan baslap oqıw jılınıń juwmaǵına shekem dawam etedi.

Tolıq maǵlıwmat alıw ushın siltemege basıń: https://lex.uz/uz/docs/-6568679

Maǵlıwmat ushın, 2024-2025-oqıw jılında JOOnıń 1-kursına usınıs etilgen abiturientler juwmaqlawshı nátiyje shıqqannan soń arza jiberiwi múmkin boladı. Olar ushın da orınlar joqarıdaǵı tártip tiykarında ajıratıladı.

NMPI baspasóz xızmeti.