Assalawma áleykum, áziz doslar, qádirli watanlaslar!

Eń aldı menen, búgingidey quwanıshlı demlerde pútkil respublikamız xalqın Watanımız Ǵárezsizliginiń 33 jıllıǵı menen shın júrekten qutlıqlayman!

Ótken dáwirde janajan Ózbekstanımız hám Qaraqalpaqstanımız mashaqatlı, sonıń menen birge, maqtanıshlı ǵárezsizlik jolın basıp ótti.

Bıyıl elimizde Watanımız Ǵárezsizliginiń otız úsh jıllıǵı «Bir bolsaq – bir xalıqpız, birlessek – Watanbız!» súreni tiykarında keń túrde belgilenbekte.

Erkin hám azat, abadan turmısımızdıń ótken jılları dawamında qolǵa kirgizilgen tabıslarımızdı esaplap kórsek, barlıq tarawlar qatarında joqarı bilimlendiriw salasında da úlken jańalanıwlar, ózgerisler ámelge asırılǵanınıń gúwası bolamız.

Sońǵı jıllarda tarawdaǵı reformalar nátiyjesinde respublikamızda jumıs alıp barıp atırǵan mámleketlik hám mámleketlik emes joqarı oqıw orınlarınıń sanı eki esege arttı. Bir ǵana Qaraqalpaqstan Respublikasında joqarı oqıw orınlarınıń sanı 12 ge jetip, olarǵa qabıllaw kórsetkishleri 3,5 esege kóbeytildi. Bunıń nátiyjesinde joqarı bilimlendiriwge qamtıw kórsetkishleri aldınǵı 19 procentten 46 procentke ósti.

Institutımızdıń jańadan paydalanıwǵa tapsırılǵan 2 mıń orınlıq oqıw imaratı Ǵárezsizlik bayramı, institutımızdıń dańqlı 90 jıllıǵı hám klassik shayırımız Ájiniyaz Qosıbay ulınıń 200 jıllıǵı, sonday-aq, jańa oqıw jılına tariyxıy bayram sawǵası boldı.

Álbette, bulardıń barlıǵı mámleketimizde bilimlendiriw tarawına qaratılıp atırǵan dıqqat-itibardıń ámeliy nátiyjeleri bolıp tabıladı.

Áziz hám qádirli watanlaslarımızdı Ózbekstan Respublikası Ǵárezsizliginiń 33 jıllıq bayramı menen jáne bir márte qutlıqlay otırıp, barlıq iygilikli tileklerińizdiń ámelge asıwın, elimiz tınısh, aspanımız ashıq, suwımız mol, xalqımızdıń turmısı abadan bolıwın tileymen!

Jańa Ózbekstannıń, Jańa Qaraqalpaqstannıń keleshegi bolǵan jaslarımızǵa oqıw hám jumıslarında bárqulla úlken tabıslar tileymen!

Húrmet penen,

Quvondiq Qodirov,
Ájiniyaz atındaǵı Nókis mámleketlik pedagogikalıq institutı rektorı w.w.a.