Búgin, 10-sentyabr kúni Túrkiya Respublikasınıń Pamuqqala universiteti Social-gumanitar pánler fakulteti túrk tili hám ádebiyatı kafedrasınıń professorı, belgili tyurkolog ilimpaz Jeyhun Vedat Uyǵur Ájiniyaz atındaǵı Nókis mámleketlik pedagogikalıq institutına keldi.

Túrkiy tiller fakultetinde kafedra baslıqları, professor-oqıtıwshılar, magistrant hám doktorantlar, sonday-aq, studentler menen bolıp ótken ushırasıwda túrkiyalı ilimpaz hám onıń ilimiy-izertlew jumısları haqqında maǵlıwmatlar berildi.

Professor Jeyhun Vedat Uyǵur «Qırǵız-qazaq-qaraqalpaq tillerindegi atawıshlar» temasında doktorlıq dissertaciyasın qorǵaǵan ilimpaz bolıp, onıń qaraqalpaq tili hám ádebiyatı boyınsha islegen kóplegen ilimiy-izertlew jumısları dúnyaǵa belgili.

Qaraqalpaq xalıq dástanlarınan «Qırq qız», qaraqalpaq xalıq jumbaqları, túrkshe-qaraqalpaqsha sózlik sıyaqlı ilimiy miynetleri qatarında klassikalıq ádebiyatımızdıń kórnekli wákili Ájiniyaz Qosıbay ulınıń dóretiwshiligine arnalǵan jumısları da keń jámiyetshiligimizge málim.

Ushırasıwda aldaǵı waqıtlarda ilimiy-izertlew jumısların birgelikte alıp barıw, óz ara tájiriybe almasıw, joqarı oqıw orınları arasında birge islesiw jumısların bunnan bılay da jetilistiriw sıyaqlı máseleler boyınsha pikir almasıldı.

Túrkiyalı ilimpaz instituttıń jańa oqıw imaratı hám ondaǵı sharayatlar menen tanısıp, ámelge asırılıp atırǵan jumıslarǵa joqarı baha berdi.

NMPI baspasóz xızmeti.