Usı jıldıń 12-sentyabr kúni Ájiniyaz atındaǵı Nókis mámleketlik pedagogikalıq institutında qábiletli studentlerdi saylap alıw hám qollap-quwatlaw, olardıń shet tillerine bolǵan qızıǵıwshılıǵın arttırıw maqsetinde inglis tilinen pán olimpiadasına start berildi.

Pán olimpiadasınıń dáslepki kúninde qatnasıwshılar eki shárt – mámlekettanıw, ádebiyat, grammatikalıq hám leksikalıq materiallar tiykarında dúzilgen 50 sorawdan ibarat test tapsırmaların orınlaw, sonday-aq, 15-20 minut dawamında kórkem filmnen úzindi kóriw hám mazmunın jazba túrde keminde 300 sózden ibarat formada bayanlaw boyınsha óz bilim hám kónlikpelerin sınaqtan ótkerdi.

Pán olimpiadası búgin, 13-sentyabr kúni ózbek yamasa rus tillindegi tekstti inglis tiline awdarıw, sonday-aq, tili úyrenilip atırǵan mámlekettiń mámleketlik dúzilisi, ekonomikası hám kórkem óneri, ullı tulǵaları, jaslardıń turmısı hám usı sıyaqlılar haqqında maǵlıwmat beriw shártleri menen dawam etedi.

Pán olimpiadasınıń jeńimpazı respublikalıq basqıshqa jollamaǵa iye boladı.

Jeńimpaz hám sıylı orın iyeleri shólkemlestiriwshiler tárepinen xoshametlenedi.

NMPI baspasóz xızmeti.