Berdaq atındaǵı Qaraqalpaq mámleketlik universitetiniń mádeniyat sarayında paytaxtımızdaǵı joqarı oqıw orınlarında oqıp atırǵan student-jaslardıń ata-anaları menen ushırasıwlar bolıp ótpekte.

Usı jıldıń 17-18-sentyabr kúnleri rejege muwapıq Ájiniyaz atındaǵı Nókis mámleketlik pedagogikalıq institutı studentleriniń ata-anaları menen ushırasıwlar ótkerilip, jaslar tálim-tárbiyası máseleleri keń túrde dodalandı.

Ushırasıwlarda Nókis qalasınıń hákimi A.Dániyarov, Nókis qalalıq Ayrıqsha jaǵdaylar bóliminiń baslıǵı J.Jubanıshev, sonday-aq, instituttıń tiyisli juwapkerleri sózge shıǵıp, mámleketimizde jaslardıń joqarı bilim alıwı ushın jaratılıp atırǵan sharayatlar haqqında maǵlıwmatlar berdi.

Sonday-aq, gúz-qız máwsiminde jaslardıń, ásirese, ijara úylerinde jasaytuǵın studentlerdiń qáwipsizligin támiyinlew, gazden záhárleniw sıyaqlı unamsız hádiyselerdiń aldın alıw, órt hám elektr qáwipsizligi qaǵıydalarına qatań ámel etiwi máseleleri haqqında sóz boldı.

Ushırasıwlarda jaslardı hár qıylı buzǵınshı illetler, zıyanlı ádetlerden qorǵaw, olardıń bos waqıtların paydalı jumıslarǵa baǵdarlaw boyınsha ámelge asırılıp atırǵan jumıslar hám aldaǵı rejeler atap ótilip, juwapker mákemeler hám ata-analar tárepinen birgelikte ámelge asırılatuǵın jumıslar kelisip alındı.

Ushırasıwlar barısında ata-analar ózlerin qızıqtırǵan sorawlarǵa tiyisli qánigeler tárepinen juwaplar aldı.

NMPI baspasóz xızmeti.