Xabarıńız bar, bıyıl Ózbekstan Respublikası Prezidentiniń tiyisli qararı menen qaraqalpaq klassikalıq ádebiyatınıń kórnekli wákili Ájiniyaz Qosıbay ulınıń 200 jıllıǵı xalıqaralıq kólemde, sonday-aq, usı ullı babamızdıń atı berilgen Nókis mámleketlik pedagogikalıq institutınıń shólkemlestirilgeniniń 90 jıllıǵı respublikalıq dárejede keń túrde belgileniwi rejelestirilgen.

Usı sánelerge baǵıshlap orınlarda ilimiy-ádebiy, mádeniy-aǵartıwshılıq ilajları menen birgelikte sport jarısları da ótkerilmekte.

Ájiniyaz atındaǵı Nókis mámleketlik pedagogikalıq institutında fakultetler arasında bolıp ótken sport jarısı da usınday ilajlardıń biri boldı.

Sporttıń mini futbol túri boyınsha ótkerilgen jarıs oǵada qızǵın túrde eki kún dawam etti.

Jarısqa barlıq fakultetlerden er studentlerden ibarat bolǵan komandalar qatnasıp, jeńimpazlıq ushın óz ara kúsh sınastı hám ózleriniń fizikalıq imkaniyatların sınaqtan ótkerdi.

Jarıstı shólkemlestiriwden baslı maqset jaslardıń bos waqıtların mazmunlı ótkeriw, olar arasında salamat turmıs tárizin úgit-násiyatlaw hám aldaǵı bolıp ótetuǵın «Universiada», «Studentler ligası», «Bes baslama olimpiadası» sıyaqlı jarıslarǵa institut saylandı komandası ushın rezerv qáliplestiriwden ibarat.

Oǵada qızǵın ótken jarıs juwmaǵında Dene mádeniyatı fakulteti komandası 1-orındı iyelep, jarıs jeńimpazı boldı. 2-orın Túrkiy tiller, al 3-orın bolsa Fizika-matematika fakulteti komandalarına nesip etti.

Jarıs jeńimpazları hám sıylı orın iyeleri institut sport klubı tárepinen sıylıqlandı.

NMPI baspasóz xızmeti.