Búgin, 19-sentyabr kúni Ájiniyaz atındaǵı Nókis mámleketlik pedagogikalıq institutında «Ózbekstan – milletler aralıq tatıwlıq hám diniy keńpeyillik mámleketi» atamasındaǵı ushırasıw hám úgit-násiyat keshesi bolıp ótti.

Ilajǵa Qaraqalpaqstan Respublikası Qazaq milliy-mádeniy orayınıń baslıǵı A.Úmbetaev, Túrkmen milliy-mádeniy orayınıń belsendi aǵzası R.Otızova, Qaraqalpaq mámleketlik universiteti qazaq tili hám ádebiyatı kafedrasınıń oqıtıwshısı R.Kenjebaeva, sonday-aq, institut tyutorları hám student-jaslar qatnastı.

Keshe miymanları tárepinen atap ótilgenindey, búgingi kúnde elimizde bir júz otızdan aslam millet hám xalıqlardıń wákilleri bir shańaraqtıń perzentlerindey tatıwlıqta, awızbirshilikte jasap, túrli tarawlarda nátiyjeli miynet etpekte. Barlıq millet hám xalıqlardıń tili, mádeniyatı, úrp-ádet hám dástúrlerin saqlaw jáne rawajlandırıw ushın barlıq sharayatlar jaratılǵan. Mámleketimiz tárepinen hár qıylı milletler arasında óz ara miyrim-shápáátti bunnan bılay da bekkemlewge ayrıqsha itibar qaratılmaqta.

Sózge shıqqanlar búgingidey globallasıw sharayatında kóplegen mámleketlerde júz berip atırǵan milliy, diniy hám etnikalıq kelispewshilikler jaǵdayında biziń elimizde hár qıylı millet wákilleriniń tınısh-tatıw, abadan turmısta ómir súriwi elimizde alıp barılıp atırǵan usı baǵdardaǵı durıs siyasattıń nátiyjesi bolıp esaplanatuǵınlıǵına ayrıqsha toqtaldı.

NMPI baspasóz xızmeti.