Usı jıldıń 24-sentyabr kúni Ózbekstan Kórkem óner akademiyasınıń Oraylıq kórgizbeler zalında ataqlı qaraqalpaq shayırı hám oyshılı Ájiniyaz Qosıbay ulı tuwılǵanınıń 200 jıllıǵı, ómiri hám dóretiwshiligine arnalǵan kitaplar, súwretlew óneri shıǵarmaları hám xalıq ámeliy óneri úlgileriniń kórgizbesi ashıldı.

Hár bir xalıqtıń ózi súygen, ardaqlaǵan shayırı boladı. Dáwirler ótken sayın shayırdıń dóretiwshiligi, ómiri áste-aqırın xalıqtıń turmısına, oy-sanasına sińisip baradı hám xalıqtıń júrek tórinen máńgi orın iyeleydi.

Ájiniyaz Qosıbay ulı qaraqalpaq xalqınıń usınday patriot shayırlarınıń biri edi.

Usı jıldıń 16-iyul kúni Ózbekstan Respublikası Prezidentiniń «Belgili qaraqalpaq shayırı hám oyshılı Ájiniyaz Qosıbay ulı tuwılǵanınıń 200 jıllıǵın keńnen belgilew haqqında»ǵı qararı qabıl etildi. Bul respublikamızdıń mádeniy hám ádebiy turmısında tariyxıy waqıya boldı. Tereń bilim, ilim, joqarı mádeniyat, názik sezim iyesi bolǵan Ájiniyaz Qosıbay ulı shıǵıs poeziyasınıń dástúrlerin úyreniw tiykarında qaraqalpaq poeziyasın kórkem-estetikalıq jaqtan bayıtqan, qosıq qatarlarına ráń-báreń kórkem forma baǵıshlaǵan, qaraqalpaq jazba ádebiyatın jańa basqıshqa kótergen kóp qırlı talant iyesi esaplanadı. Onıń shıǵarmaları XIX ásir qaraqalpaq ádebiyatınıń gúltajı boldı.

Xiywadaǵı dúnyaǵa belgili Sherǵazıxan hám Qutlımurat inaq medreselerinde bilim alǵan bul ullı tulǵa tek ǵana elimizde emes, sonıń menen birge, pútkil regionımızda xalıqshıl shayır, jetik ustaz, belgili kalligraf sıpatında da dańqqa bólengeni dıqqatqa ılayıqlı.

Kórgizbeniń saltanatlı ashılıw máresiminde Ózbekstan Kórkem óner akademiyasınıń baslıǵı Akmal Nur, Qaraqalpaqstan Respublikası Joqarǵı Keńesiniń komitet baslıǵı Tájibay Romanov, Ózbekstan Kórkem óner akademiyası Qaraqalpaqstan bóliminiń baslıǵı Ulbosın Utegenova, Qaraqalpaq mámleketlik universitetiniń professorı Perdebay Nurjanov, Qaraqalpaqstan xalıq xudojnigi, Berdaq atındaǵı mámleketlik sıylıqtıń laureatı Barlıqbay Aytmuratov sózge shıqtı.

Sózge shıqqanlar Prezidentimizdiń baslaması menen mámleketimizde ullı ata-babalarımızdıń esteligin máńgilestiriw, olardıń miyrasların qásterlep-saqlaw, keleshek áwladlarǵa jetkeriwge úlken itibar qaratılıp atırǵanı, Ájiniyaz Qosıbay ulı tuwılǵanınıń 200 jıllıǵın belgilew YuNESKOnıń xalıqaralıq yubileyler rejesine kirgizilgeni de onıń dóretiwshilik miyrasınıń ulıwma insanıy áhmiyetke iye ekenliginen dárek beretuǵınlıǵı, onıń kórkem shıǵarmaları túrkmen, qazaq, qırǵız hám basqa tuwısqan xalıqlar tárepinen de súyip oqılıwı, usı kórgizbe shayırdıń tákirarlanbas ádebiy miyrasın bunnan bılay da keńnen úyreniw hám ǵalaba en jaydırıwǵa xızmet etetuǵınlıǵın atap ótti.

Ilajda Qaraqalpaqtan Respublikasında xızmet kórsetken artist, «Doslıq» ordeni iyesi, Qaraqalpaqstan Respublikası opera hám baqsıshılıq ónerine qánigelestirilgen mektep-internatınıń direktorı Dáribay Xojabergenov Ájiniyaz Qosıbay ulı obrazında «Ájiniyaz» operasınan ariya hám qosıqlarınan úzindi atqardı.

Nókis qánigelestirilgen mádeniyat mektebiniń aǵa oqıtıwshısı, belgili baqsı Maqset Ayekeev «Ellerim bardı» hám «Bozataw» qosıqların atqardı.

Ájiniyaz Qosıbay ulı tuwılǵanınıń 200 jıllıǵı, ómiri hám dóretiwshiligine arnalǵan usı kórgizbeden qaraqalpaqstanlı xudojnikler Miyrasxan Serjanova, Qazaqbay Xojamuratov, Baqbergen Nurımbetov, Vasiily Djaparov, Sársenbay Baybosınov, Jollıbay Izentaev, Barlıqbay Aytmuratov, Murat Xudaybergenov hám basqa dóretiwshilerdiń shıǵarmaları orın alǵan. K.Behzod atındaǵı Milliy súwretshilik hám dizayn institutınıń pitkeriwshileri bolǵan jas xudojnikler Sherali Jumaniyazov, Barchinoy Pardaeva, sonday-aq, ámeliy óner boyınsha Juldız Alpısbaevanıń zergerlik buyımları hám qaraqalpaq milliy kiyimindegi quwırshaqlar tamashagóylerdiń názerine usınılmaqta.