Búgin, 28-sentyabr kúni Ájiniyaz atındaǵı Nókis mámleketlik pedagogikalıq institutında studentlerdiń ata-anaları menen ushırasıw bolıp ótti.

Ushırasıwǵa Nókis qalası prokurorı R.Báwetdinov, Nókis qalalıq Ayrıqsha jaǵdaylar bóliminiń baslıǵı J.Jubanishev, Nókis qalası hákimliginiń wákilleri, alıs aymaqlar hám rayonlardan kelip, tiykarınan ijara úylerinen oqıwǵa qatnaytuǵın student-jaslardıń ata-anaları, fakultetlerdiń dekanları, tyutorlar hám tiyisli juwapker qánigeler qatnastı.

Ilajdı institut rektorı wazıypasın waqıtsha atqarıwshısı Q.Qodirov basqarıp bardı.

Ushırasıwda atap ótilgenindey, gúz-qıs máwsimi kirip keliwi hám hawa rayınıń salqınlanıwı menen elimizde jılıtıw máwsimi baslanıp, orınlarda gazden záhárleniwdiń aldın alıw, órt qáwipsizligi qaǵıydalarına ámel etiw boyınsha túsindiriw hám úgit-násiyat jumısları turaqlı ámelge asırıladı. Ásirese, bunda taraw wákilleri menen birgelikte joqarı oqıw orınlarınıń juwapker qánigeleri tárepinen ijara úylerinde jasaytuǵın studentlerdiń jasaw jaǵdayları úyrenilip, tiyisli tártipte profilaktikalıq jumıslar alıp barıladı. Degen menen, usınday ilajlarda ata-analardıń roli, olardıń da óz waqtında qadaǵalaw júrgiziwi orın alıp atırǵan ayırım baxıtsız hádiyselerdiń aldın alıwda úlken tásirin tiygizeri sózsiz.

Usı maqsette jergilikli hákimlik, prokuratura, ayrıqsha jaǵdaylar bólimi, joqarı oqıw orınları hám ata-analar birgelikte háreket etse gózlengen maqsetke erisiw nátiyjeli bolatuǵınlıǵı atap ótildi.

Maǵlıwmatlarǵa qaraǵanda, paytaxtımız Nókis qalasında házirgi waqıtta 665 kóp qabatlı turaq jay bolıp, olardıń 435 i aldınǵı dáwirde qurılǵan jaylar esaplanadı. Olarda oraylıq jılıtıw sisteması bolmaǵanlıqtan 12 mıńnan aslam kvartiralarda qolbala usılda tayarlanǵan jılıtıw úskenelerinen paydalanıw jaǵdayları úyreniwler barısında anıqlanǵan.

Bulardı basqıshpa-basqısh zamanagóy tiptegi jılıtıw úskenelerine almastırıw boyınsha túsindiriw hám úgit-násiyat jumısları dawam ettirilmekte.

Ushırasıwda jaslar arasında jınayatshılıq hám huqıqbuzarlıq jaǵdaylarınıń da jiyi ushırasıp atırǵanlıǵı olar arasında profilaktikalıq jumıslardı da birgelikte ámelge asırıw zárúrligin payda etip atırǵanlıǵı ayrıqsha sóz etildi.

Ilajda kún tártibindegi atap ótilgen máseleler boyınsha birgelikte ámelge asırılatuǵın jumıslar belgilep alınıp, juwapkerlerge tiyisli tapsırmalar berildi.

NMPI baspasóz xızmeti.