Usı jıldıń 15-oktyabr kúni Taxtakópir rayonındaǵı Qaratereń kóli boyında jańadan qurılǵan, hesh jerde uqsası joq milliy kolorittegi «Qaratereń» etno-turistlik kompleksiniń ashılıwı múnásibeti menen jaslar festivalı ótkerildi.

Ilajǵa respublikamız jasları, mádeniyat hám kórkem óner xızmetkerleri, keń jámiyetshilik, ǵalaba xabar quralları wákilleri qatnastı.

Dáslep, miymanlar dástúrlerimizge sáykes túrde nan-duz benen kútip alındı. Bunnan soń túrli millet wákilleriniń milliy úrp-ádetleri hám dástúrleri jámlengen teatrlastırılǵan kompoziciyalar, milliy qaraúyler janında tuwısqan xalıqlardıń kúndelikli turmısın sáwlelendiretuǵın kórinisler, túrli oyın-zawıq tamashaları jıynalǵanlar názerine usınıldı.

Keń kólemde ótkerilgen jaslar festivalında besik shabar, tusawkeserden baslap, qız jıyını, qız uzatıw, betashar hám basqa da ata-babalarımızdan qalǵan bay miyraslarımız, milliy úrp-ádetlerimiz, sonday-aq, qaraqalpaq xalqı hám tuwısqan xalıqlardıń milliyligi, ózligi hám ózgesheligin jámlegen digirman tartıw, urshıq iyiriw, gúbide may pisiriw sıyaqlı turmıslıq kórinisler, túrli xalıqlar dasturqanınan taǵamlar, awıl xojalıǵı ónimleri yarmarkaları, kól boyında jaslar seyilleri, jılqı, túyede seyil etiw, usı sıyaqlı oǵada bay etno ortalıq barlıq qatnasıwshılarda úlken tásirler qaldırdı.

Ásirese, Bórshiniń tawı tóbesinde dárwazlar shıǵıwları, ónermentlerdiń qol ónerleri, xudojniklerdiń tábiyat gózzallıǵın súwretlewi, sawlat tógip turǵan jawınger qızlar hám basqa da kórinisler ózgeshe zawıq baǵıshladı.

Keshki koncert baǵdarlaması «Fashion night» túrli millet wákilleri kiyimleri kórgizbesi, muzıkalı baǵdarlama hám salyutler shouı menen dawam etti.

Qaraqalpaqstan Respublikası Joqarǵı Keńesiniń málimleme xızmeti.