Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasına miyneti sińgen ilim ǵayratkeri, Beruniy atındaǵı mámleketlik sıylıqtıń laureatı, filologiya ilimleriniń doktorı, professor Sarıgúl Bahadırovanıń tuwılǵanına 80 jıl tolıwına arnalǵan «Qaraqalpaq folklorı hám ádebiyatın dúnyaǵa tanıtqan ilimpaz» atamasındaǵı respublikalıq ilimiy-ámeliy konferenciya bolıp ótti.

Konferenciyada instituttıń ilimiy isler hám innovaciyalar boyınsha prorektorı Raxat Eshmuratov sózge shıǵıp, belgili ilimpaz, ádebiyatımızdıń jankúyer pidayılarınıń biri bolǵan ustaz Sarıgúl apanı yubiley jası menen qutlıqladı.

Sarıgúl Bahadırova 1944-jılı Qaraózek rayonında dúnyaǵa kelgen. Awıldaǵı orta mektepti pitkerip, dáslep sol waqıttaǵı Qaraqalpaq mámleketlik pedagogikalıq institutında, sońınan Tashkent qalasında Ózbekstan Ilimler Akademiyasınıń aspiranturasında oqıdı. 1970-jılı «Házirgi qaraqalpaq gúrrińleri» temasında kandidatlıq dissertaciyasın qorǵadı. Sol jıllardan baslap ol Ózbekstan Ilimler Akademiyası Qaraqalpaqstan bóliminiń Nájim Dáwqaraev atındaǵı Til hám ádebiyat institutında ilimiy xızmetker, sońınan bólim baslıǵı lawazımlarında jumıs isledi.

Ol 1985-jılı «Folklor hám qaraqalpaq sovet prozası» temasında doktorlıq dissertaciyasın qorǵadı. 1991-jıldan 2009-jılǵa shekem Nájim Dáwqaraev atındaǵı Til hám ádebiyat institutınıń direktorı lawazımında jemisli miynet etti. Sarıgúl Bahadırova 1997-jıl sentyabr ayında Nókis qalasında qaraqalpaq xalqınıń dúnyaǵa belgili «Qırıq qız» dástanı boyınsha xalıqaralıq konferenciyanı ótkeriwge baslama kóterdi hám onıń shólkemlestiriwshisi boldı. Ol 1996-jıldan baslap Ózbekstan Jazıwshılar awqamınıń aǵzası esaplanadı.

Sarıgúl Bahadırova tek ǵana ilim menen shuǵıllanıp qoymastan, ádebiy dóretiwshilikte de óz aldına mektep jarata alǵan hayal-qızlardıń biri. Onıń «Hayallar», «Ómir sabaǵı», «Táǵdir», «Keshikken soldat», «Tumaris» povest hám romanları, sonday-aq, «Anama xat», «Bala – beldiń dimarı», «Aǵayin» hám t.b. gúrrińleri xalqımız arasında súyip oqılatuǵın shıǵarmalar bolıp tabıladı. Ol Qaraqalpaqstan Jaslar awqamı sıylıǵınıń laureatı.

Onıń «Roman hám dáwir», «Folklor hám qaraqalpaq sovet prozası», «Kitabı dedem Qorqıt», «Qoblan», «Edige» hám «Házirgi ádebiyat haqqında oylar», «Qaraqalpaq qanday xalıq» atamasındaǵı ilimiy miynetleri ádebiyatımızda oǵada úlken qunlılıqqa iye.

Sonday-aq, Sarıgúl Bahadırova qaraqalpaq folklorınıń 100 tomlıǵın baspaǵa tayarlawda hám onıń jarıq kóriwinde ayanbay miynet etken ádebiyatımızdıń pidayısı esaplanadı.

Onıń usınday xızmetleri mámleketimiz hám húkimetimiz tárepinen múnásip bahalanıp, Qaraqalpaqstan Respublikasına miyneti sińgen ilim ǵayratkeri húrmetli ataǵı berildi. Sonıń menen birge, Ózbekstan Respublikası Beruniy atındaǵı mámleketlik sıylıqtı laureatı boldı.

Konferenciyada filologiya ilimleriniń doktorı, professor Ziyada Bekbergenova, instituttıń qaraqalpaq ádebiyatı kafedrası docenti Mariya Bekbergenova, qaraqalpaq tili kafedrasınıń docenti Alima Pirniyazova, ózbek ádebiyatı kafedrasınıń docenti Nodira Allambergenovalar professor Sarıgúl Bahadırovanıń ómiri, dóretiwshiligi, kórkem prozası, onıń shıǵarmalarında hayal-qızlar lekseması, folklortanıwshılıq miynetleri haqqında bayanatlar jasadı.

Sonday-aq, professordıń shákirtleri, birge islesip atırǵan kásiplesleri, aǵayin-tuwısqanları da sózge shıǵıp, Sarıgúl apanıń pidayılıq xızmetleri haqqında maǵlıwmatlar berdi.

Konferenciya instituttıń talantlı studentleri atqarıwındaǵı kórkem-ádebiy bólim menen dawam etti.

NMPI baspasóz xızmeti.