Ájiniyaz atındaǵı Nókis mámleketlik pedagogikalıq institutında jaslardıń sociallıq-siyasiy bilim hám kónlikpelerin arttırıw, Konstituciyanı úgit-násiyatlaw, úlken tájiriybege iye bolǵan hám dúnya kóleminde de ózin kórsete alatuǵın joqarı mánawiyatlı jaslardıń sanın kóbeytiw, jaslardı birlikke shaqırıw, olarǵa keń imkaniyatlar jaratılǵanın kórsetiw, jas izleniwshi jaslardı bir jerge toplap, usınısların úyrenip, olar tiykarında keleshekte basqa izertlew jumısların ótkeriw maqsetinde «Keliń, jaslar birgelikte kitap oqıymız!» súreni tiykarında «Úshinshi Renessans jadidleri-2024» kitapqumarlıq forumı shólkemlestirildi.

Forum málimleme-resurs orayı tárepinen shólkemlestirilgen kitaplar kórgizbesi menen baslandı. Pedagogika hám Túrkiy tiller fakultetleriniń talantlı studentleri xalıq qosıqların atqarıp, ádebiy shıǵarmalardaǵı hár qıylı qaharmanlar obrazların sáwlelendirdi.

Ilajda Tashkent mámleketlik Shıǵıstanıw institutı klassikalıq filologiya kafedrasınıń professorı Boqijon Tuxliev, Ózbekstan Milliy universiteti ózbek ádebiyattanıwı kafedrasınıń professorı Nasimxon Raxmanov, instituttıń ózbek ádebiyatı kafedrasınıń docentleri Nodira Allambergenova hám Hamza Allambergenov sózge shıǵıp, kitap oqıw ruwxıy jetikliktiń tiykarı ekenligi, globallasıw sharayatında kitapqumarlıq hám jámiyetlik rawajlanıw ózgeshelikleri, jadidshilik ádebiyatınıń ideologiyalıq áhmiyeti haqqında maǵlıwmatlar berdi.

Sonday-aq, ózbek ádebiyatı kafedrası janındaǵı «Nihol» ilimiy-ádebiy dógereginiń aǵzası Ozoda Userbaeva hám Tariyx fakultetiniń studenti Jasurbek Nurullaevlar jaslar arasında kitapqumarlıq mádeniyatın arttırıw, jadid ata-babalarımızdıń ádebiy hám tariyxıy miyrası haqqında bayanatlar jasadı.

Forum óz ara pikir almasıw hám soraw-juwaplar menen dawam etti.

NMPI baspasóz xızmeti.