Búgin, 1-noyabr kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Oliy Majlisi Senatınıń aǵzası, Ózbekstan kásiplik awqamı Federaciyasınıń Qaraqalpaqstan keńesi baslıǵı Ulıqbek Jalmenovtıń jaslar menen ushırasıwı bolıp ótti.

11-noyabr – Ózbekstan kásiplik awqamları kúni bayramı aldınan shólkemlestirilgen ushırasıwǵa túrli tarawlarda nátiyjeli miynet etip atırǵan, sonday-aq, bilimlendiriw mákemelerinde oqıp, joqarı kórsetkishlerge erisip kiyatırǵan jaslar, jaslar tálim-tárbiyasına juwapker qánigeler, pedagoglar qatnastı.

Ilajda Ulıqbek Jalmenov mámleketimizde jaslardı hár tárepleme qollap-quwatlaw baǵdarında ámelge asırılıp atırǵan jumıslar, bunday iygilikli baslamalarǵa kásiplik awqamlarınıń qosıp atırǵan úlesi, tarawlarda xızmet etip atırǵan kásiplik awqamlarınıń wazıypaları haqqında maǵlıwmatlar berdi.

Ushırasıwda jaslar ózlerin qızıqtırǵan sorawlarǵa juwap aldı.

Ilajda elimizde jaslar tárbiyası hám olardıń huqıq jáne máplerin qorǵaw arqalı kásiplik awqamınıń jumısların jetilistiriwge qosıp atırǵan múnásip úlesleri ushın Ájiniyaz atındaǵı Nókis mámleketlik pedagogikalıq institutı Jaslar awqamı baslanǵısh shólkeminiń jetekshisi Bayrambay Gúlimbetov Ózbekstan kásiplik awqamı Federaciyasınıń Qaraqalpaqstan keńesi tárepinen húrmet jarlıǵı menen sıylıqlandı.

NMPI baspasóz xızmeti.