Búgin, 7-noyabr kúni respublikamızda ótkerilip atırǵan «Akademik hám jaslar: Ilimniń rawajlanıwın jaslar jaratadı!» atamasındaǵı kongress sheńberinde Ájiniyaz atındaǵı Nókis mámleketlik pedagogikalıq institutında akademikler hám jaslar ushırasıwı bolıp ótti.

Ushırasıwǵa Ózbekstan Ilimler Akademiyasınıń haqıyqıy aǵzaları – akademikler Ahmadali Asqarov hám Sadulla Bahramov, sonday-aq, Ózbekstan Ilimler Akademiyasınıń vice-prezidenti Sirojiddin Mirzaev hám Ózbekstan Shaxmat federaciyasınıń vice-prezidenti Rustam Davletov, institut doktorantları, magistrantlar jáne ilimiy izleniwshi jaslar qatnastı.

Ilajda akademikler hám miymanlar sózge shıǵıp, házirgi dáwirde ilim tarawındaǵı áhmiyetli mashqalalar, ilimiy-izertlew jumıslarında jańa texnologiyalardıń áhmiyeti hám ilim tarawında qolǵa kirgizilip atırǵan nátiyjeler haqqında maǵlıwmatlar berdi. Ózleriniń ómirlik tájiriybeleri menen bólisti.

Ushırasıwdı shólkemlestiriwden tiykarǵı maqset jaslardı ilim hám innovaciyalarǵa keńnen tartıw, olardıń ilimiy-izertlew jumıslarına bolǵan qızıǵıwshılıqların arttırıw, jas izleniwshilerdiń belgili ilimpazlar menen pikirlesiwin jolǵa qoyıwdan ibarat.

Ushırasıwda jaslar akademiklerge ózlerin qızıqtırǵan sorawların berip, olardıń tájiriybelerinen ózlerine tiyisli bilim hám kónlikpeler aldı.

NMPI baspasóz xızmeti.