Usı jıldıń 9-noyabr kúni Qaraqalpaqstan Respublikası Nókis qalasında Joqarı bilimlendiriw, ilim hám innovaciyalar ministrliginiń keńeytilgen Kollegiallıq jıynalısı ótkeriliwi, sonday-aq, tarawda «Jasıl mákan» ulıwma milliy joybarı sheńberinde Ulıwma respublikalıq marafonǵa start beriliwi hám Nókis qalasında ajıratılǵan jer maydanında «Ziyalılar baǵı»n shólkemlestiriw maqsetinde terek nállerin otırǵızıw jobalastırılǵan.

Usı ilajlarǵa qatnasıw maqsetinde Qaraqalpaqstan Respublikasına kelgen respublikamızdaǵı joqarı oqıw orınlarınıń wákilleri hám student-jasları ushın Ájiniyaz atındaǵı Nókis mámleketlik pedagogikalıq institutı tárepinen mádeniy-kewilashar hám sport ilajları shólkemlestirildi.

Koncert baǵdarlamasında jaslar qaraqalpaq milliy hám estrada qosıqlarına ayaq-oyınǵa túsken bolsa, shaxmat hám shashka boyınsha ótkerilgen doslıq oyınlarında óz ara pikirlesti. Sonıń menen birge, qaraqalpaq kino dóretiwshileri tárepinen súwretke alınǵan kórkem film miymanlardıń názerine usınıldı. Keshki baǵdarlamada studentler turaq jayı aldında jaslar ushın gúlxan átirapında zawıqlı ádebiy-mádeniy keshe shólkemlestiriw belgilengen.

NMPI baspasóz xızmeti.