Búgin, 10-noyabr kúni Ájiniyaz atındaǵı Nókis mámleketlik pedagogikalıq institutında «Ziyalı jaslar» intellektual klubınıń shólkemlestirilgenine 20 jıl tolıwı hám 11-noyabr – Ózbekstan kásiplik awqamları kúni bayramı múnásibeti menen «Ziyalı jaslar CUP» intellektual turniri bolıp ótti.

«Zakovat» hám «Breyn ring» intellektual oyınlarınan ibarat bolǵan turnirge Qaraqalpaqstan Respublikası «Zakovat» intellektual klubı Professional Liga hám Birinshi Liga turnirlerindegi joqarı kórsetkishlerge erisip kiyatırǵan komandalar hám instituttıń ishki intellektual birinshiliklerinde qatnasıp atırǵan komandalar, sonday-aq, miyman sıpatında Xorezm wálayatı Professional Ligasınan birneshe komandalar qatnastı.

Qatnasıwshılar dáslep 3 tur dawam etken, jámi 36 soraw oynalǵan «Zakovat» oyınında ózleriniń bilim hám kónlikpelerin sınaqtan ótkergen bolsa, «Breyn ring» intellektual oyınında logikalıq imkaniyatları, ziyrekligi hám shaqqanlıǵın kórsetiwge háreket etti.

Oǵada qızǵın tárizde ótken turnir juwmaǵında, «Zakovat» intellektual oyını boyınsha:

1-orın – «Idrok» (Xorezm wálayatı);
2-orın – «Armageddon»;
3-orın – «Berkut» komandalarına nesip etken bolsa,

«Breyn ring» intellektual oyınında:

1-orındı – «Armageddon»;
2-orındı – «Divergent»;
3-orındı – «Berkut» komandaları iyeledi.

Jeńimpazlarǵa hám sıylı orın iyelerine instituttıń kásiplik awqamı komiteti tárepinen tayarlanǵan kubok, medal, diplomlar hám bayram sawǵaları tapsırıldı.

Ilajda «Ziyalı jaslar» intellektual klubınıń baslıǵı Baxtiyar Bekmuratov jáne usı klubtıń veteran aǵzaları sózge shıǵıp, elimizde qábiletli jaslardıń logikalıq bilimlerin arttırıw, olardı saylap alıw hám intellektual oyınlarǵa keńnen tartıw, xalıqtıń intellektuallıq potencialın jetilistiriw maqsetinde birqatar unamlı jumıslar alıp barılıp atırǵanı, álbette, bunday itibar hám jaratılǵan sharayatlardan nátiyjeli paydalanıp atırǵan jaslar ómirde óz ornın tawıp, bilimli, jetik insanlar bolıp jetilisip, mámleketimizdiń, jámiyetimizdiń rawajlanıwına óz úleslerin qosıp atırǵanlıǵın atap ótti.

Usınday joqarı maqsetler menen bunnan 20 jıl burın shólkemlestirilgen «Ziyalı jaslar» intellektual klubı da elimizdiń birqansha jaslarına haqıyqıy mánidegi turmıslıq tájiriybe hám ilim-bilim mektebi sıpatında xızmet etpekte. Intellektual klub aǵzaları aymaqlıq, respublikalıq hám xalıqaralıq dárejede shólkemlestirilgen «Zakovat», «Jeke oyın», «Breyn ring», «Erudit-kvartet» hám usı sıyaqlı birneshe tańlawlarda joqarı kórsetkishlerdi qolǵa kirgizip kelmekte. Klub tárepinen ótkerilip kiyatırǵan «Aydın» intellektual turniri elimizdiń bilimli, ziyrek, qábiletli, ilimge talpınǵan jasların bir jerde jámley alǵan joybarǵa aylandı.

NMPI baspasóz xızmeti.