18-noyabr – Ózbekstan Respublikasınıń «Mámleketlik bayraǵı haqqında»ǵı nızamınıń qabıl etilgen kúni. Sáne múnásibeti menen Ájiniyaz atındaǵı Nókis mámleketlik pedagogikalıq institutında ushırasıw hám bayram keshesi bolıp ótti.

Mámleketlik gimnler menen baslanǵan saltanatlı ilajǵa Qaraqalpaqstan Respublikası Ádillik ministrliginiń huqıqıy málimleme sektorı baslıǵı N.Berdiniyazova, instituttıń milliy ideya, ruwxıylıq tiykarları hám huqıq tálimi kafedrasınıń docenti T.Qudaybergenova, institut rektorınıń másláhátshisi Ǵ.Ibadullaev, professor-oqıtıwshılar, tyutorlar hám studentler qatnastı.

Ushırasıwdı institut rektorı wazıypasın waqıtsha atqarıwshısı Q.Qodirov basqarıp bardı.

Ilajda sózge shıqqanlar tárepinen atap ótilgenindey, bıyıl mámleketlik suverenitettiń belgilerinen biri bolǵan ǵárezsiz Ózbekstan Respublikasınıń «Mámleketlik bayraǵı haqqında»ǵı nızamınıń qabıl etilgenine 33 jıl tolmaqta. Ózbekstan Respublikası Oliy Kengashiniń 1991-jıl 18-noyabrdegi gezekten tıs VII sessiyasında tastıyıqlanǵan mámleketlik bayraǵı jer júzinde ǵárezsiz Ózbekstan degen mámlekettiń bar ekenligin ańlatadı hám ózinde milliy-mádeniy dástúrlerdi jámleydi.

Bayraq ózinde pútkil Ózbekstan xalqınıń ázeliy tilek-umtılısları, erk-ıqrarı, xalqımızǵa tán miymandoslıqtı sáwlelendirgen. Mámleketlik bayraqtıń mámleketlik mákeme hám shólkemler, oqıw orınları, Ózbekstan aǵzası bolǵan xalıqaralıq shólkemler, sırt ellerdegi elshixana hám turaqlı wákilxanalardıń aldında jelbirep turıwı, hár qıylı bayram saltanatlarında, mámleketimiz wákilleri qatnasıp atırǵan xalıqaralıq kólemdegi siyasiy, mádeniy-aǵartıwshılıq ilajlarda, abıraylı sport jarıslarında watanımızdıń abıray-mártebesi, xalqımızdıń maqtanıshın ayqın sáwlelendirip, kewillerdi tolqınlandıradı.

Mámleketlik belgiler bárqulla muqaddes hám ullı bolıp tabıladı. Óytkeni, ol xalıqtıń ótmishi, búgini hám keleshegin ózinde jámlegen watannıń simvolı esaplanadı.

Ilaj instituttıń «Tumaris» xalıq ansambli hám qábiletli studentleri atqarıwındaǵı koncert baǵdarlaması menen dawam etti.

NMPI baspasóz xızmeti.