Ájiniyaz atındaǵı Nókis mámleketlik pedagogikalıq institutı málimleme-resurs orayında Qaraqalpaqstan baspasóziniń kárwanbasshısı, Qaraqalpaqstan Respublikası Joqarǵı Keńesi hám Ministrler Keńesiniń organı, xalqımız súyip oqıytuǵın «Erkin Qaraqalpaqstan» gazetasınıń 100 jıllıǵına arnalǵan «Eldiń birligi hám abadanlıǵı ushın» atamasındaǵı ushırasıw bolıp ótti.

Ushırasıwǵa Qaraqalpaqstan Respublikasına miyneti sińgen jurnalist, kóplegen jaslardıń ustazı Perdegúl Xojamuratova, «Erkin Qaraqalpaqstan» gazetasınıń bólim redaktorı Biybijamal Karamatdinova, institut málimleme-resurs orayınıń bólim baslıǵı Rita Amanbaeva, Mektepke shekemgi tálim fakultetiniń tyutorı Gúljáhán Artikova hám basqa da tyutorlar, student-jaslar qatnastı.

Ilajda miymanlar elimizde 1924-jılı noyabr ayında qaraqalpaq tilinde «Erkin Qaraqalpaq» ataması menen eń dáslepki gazeta baspadan shıǵarılǵanlıǵı, gazetanıń bir ásirlik tariyxı, onda jumıs islep, mámleketimizde júz berip atırǵan ózgerisler hám jańalıqlardı xalqımızǵa óz waqtında, joqarı jurnalistlik sheberlik penen jetkeriwdey ádiwli wazıypalardı atqarǵan nuranıy ustazlar, belgili tulǵalar haqqında maǵlıwmatlar berdi.

Sonıń menen birge, gazetanıń búgingi turmısı, redakciya aǵzaları, olardıń wazıypaları, jańalıqlar hám xabarlar, publicistikalıq hám analitikalıq maqalalardı oqıwshılarǵa jetkeriw usılları, gazetanı basıp shıǵarıw procesi haqqında aytıp ótti.

Ushırasıwda qatnasıwshılar súyikli gazetamızdıń tariyxı hám búgini haqqında bahalı maǵlıwmatlarǵa iye boldı. Jaslar ózlerin qızıqtırǵan sorawlarǵa miymanlardan tolıq juwaplar aldı.

NMPI baspasóz xızmeti.