1992-jıl 14-dekabr kúni Qaraqalpaqstan Respublikası Joqarǵı Keńesiniń XI sessiyasında «Qaraqalpaqstan Respublikasınıń mámleketlik bayraǵı haqqında»ǵı Nızam qabıl etildi.

Búgin, 14-dekabr kúni Nókis qalasınıń orayında ornatılǵan Ózbekstan hám Qaraqalpaqstan Respublikalarınıń mámleketlik bayraqları janında «Qaraqalpaqstan Respublikasınıń mámleketlik bayraǵı haqqında»ǵı Nızamı qabıl etilgenine 32 jıl tolıwı múnásibeti menen bayram ilajı bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, xalqımızdı bayram múnásibeti menen qutlıqladı.

Atap ótilgenindey, elimiz bayraǵı jaqsılıq, danıshpanlıq, páklik, sadıqlıq, gózzallıq, tınıshlıq, jańalanıw sıyaqlı sezimlerdi ózinde jámlegeni menen áhmiyetli sanaladı. Solay eken, elimiz bayraǵın kóz qarashıǵınday qásterlep-saqlaw, onı ulıǵlaw hám bálentlerge kóteriw – hár birimiz ushın ana Watan aldındaǵı perzentlik parızımız bolıp esaplanadı.

Sońǵı jılları xalqımız turmısında, insanlardıń ruwxıy dúnyasında úlken ózgerisler menen jańalanıwlar júz bermekte. Bunda húrmetli Prezidentimiz tárepinen tek ǵana Qaraqalpaqstan ushın qabıl etilgen qarar hám pármanlar xalqımızdıń abadan turmısın támiyinlew boyınsha oǵada kólemli jumıslar ámelge asırılıwına tiykar bolmaqta.

Ilajda mine usınday elimiz abadanlıǵı jolında ámelge asırılıp atırǵan jumıslar keń túrde atap ótildi.

Bayram ilajı kórkem óner hám mádeniyat xızmetkerleriniń koncert baǵdarlaması menen dawam etti.

Qaraqalpaqstan Respublikası Joqarǵı Keńesiniń Málimleme xızmeti.