Ájiniyaz atındaǵı Nókis mámleketlik pedagogikalıq institutında 1-2-kurs studentleriniń ilimiy-izertlew jumıslarına bolǵan qızıǵıwshılıǵın qollap-quwatlaw hám olarǵa hár tárepleme kómeklesiw maqsetinde «Ilimiy dóretiwshilikke dáslepki qádem» atamasındaǵı oqıw-seminarı bolıp ótti.

Bes kún dawam etken oqıw-seminarında qatnasıwshılarǵa instituttıń magistratura bólimi muzıkalıq tálim hám kórkem óner qánigeliginiń 2-kurs magistrantı, Nawayı atındaǵı mámleketlik stipendiya tańlawınıń jeńimpazı Gúlayım Tilepova tezis, ilimiy maqala, referat hám basqa da ilimiy dóretiwshilik formaları haqqında túsinik berip, olardı jazıw qaǵıydaları, ataqlı mámleketlik stipendiyalar ushın kerekli hújjetler toplamın tayarlaw boyınsha, instituttıń jaslar menen islesiw, ruwxıylıq hám aǵartıwshılıq bóliminiń metodisti, elimizdiń eń belsendi jaslarınıń biri Erniyaz Qasımov hám magistratura bólimi biologiya qánigeliginiń 1-kurs magistrantı, «Mırza Ulıǵbek áwladları» hám «TechnoWays» respublikalıq tańlawlarınıń jeńimpazı, Islam Kárimov atındaǵı mámleketlik stipendiya tańlawınıń jeńimpazı Jalalatdin Usnatdinov institutta jaslardıń ilimiy-izertlew jumısların qollap-quwatlaw baǵdarında jaratılǵan imkaniyatlar, jeńillikler, belsendi studentler qatarında bolıw hám startap joybarlardı islep shıǵıw jáne tańlawlar haqqında maǵlıwmatlarǵa iye bolıw haqqında óz tájiriybeleri menen bólisti.

Oqıw-seminarın tabıslı pitkergen qatnasıwshı jaslarǵa sertifikatlar tapsırıldı.

NMPI baspasóz xızmeti.