Aldın xabar bergenimizdey, Ájiniyaz atındaǵı Nókis mámleketlik pedagogikalıq institutı hám Germaniya Federativ Respublikasınıń Drezden texnika universiteti arasında «ERASMUS+» joybarı sheńberinde dúzilgen shártnamaǵa muwapıq, institutta germaniyalı studentler Ellen Kremer hám Annika Zuker tórt ay dawamında akademiyalıq mobillik tiykarında oqıwın alıp bardı.

Olar pedagogikalıq ámeliyat dáwirinde paytaxtımızdaǵı 1-sanlı ulıwma bilim beriw mektebinde boldı, sonday-aq, institutta rus tili hám ádebiyatı tálim baǵdarınıń sabaqlarına qatnastı.

Belgilengen joybardıń juwmaqlarına arnalǵan ushırasıwda Shet tilleri fakultetiniń dekanı I.Dilmanov hám fakultetler aralıq shet tilleri kafedrası docenti, joybar koordinatorı A.Narshabaeva menen birgelikte institut rektorı atınan usı joybar basshısı, Drezden texnika universiteti ulıwma didaktika hám oqıtıwdı empirikalıq izertlew kafedrası baslıǵı, professor Aksel Germannǵa, joybar koordinatorı Yuliya Koynova-Colnerge hám studentler Ellen Kremer hám Annika Zukerge minnetdarshılıq xatların tapsırdı.

Óz gezeginde, germaniyalı studentler instituttaǵı oqıw hám pedagogikalıq ámeliyat barısına joqarı baha berip, shólkemlestiriwshilerge, institut rektoratı hám fakultet jámáátine minnetdarshılıǵın bildirdi.

Atap ótiw orınlı, bul joybar sırt el joqarı oqıw orınları menen birge islesiwdi jańa basqıshqa kóteriwi menen bir qatarda, innovaciyalıq metodlardı oylap tabıwda úlken áhmiyetke iye esaplanadı.

NMPI baspasóz xızmeti.