Ájiniyaz atındaǵı Nókis mámleketlik pedagogikalıq institutında islep atırǵan juwapker xızmetkerlerdiń jumıs procesindegi bilimleri hám tájiriybesin arttırıp barıw maqsetinde turaqlı túrde oqıw-seminarları shólkemlestirilip kelinbekte.

Búgin, 3-yanvar kúni ótkerilgen usınday seminar korrupciyaǵa qarsı gúresiw, mápler soqlıǵısıwı, sonday-aq, fizikalıq hám yuridikalıq shaxslardıń múrájatları haqqındaǵı nızam hújjetleriniń mazmunı jáne áhmiyetin keń túrde túsindiriwge arnaldı.

Seminardı instituttıń jaslar máseleleri, ruwxıylıq hám aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov kiris sózi menen ashıp berdi hám búgingi ilaj institut keńesinde belgilengen wazıypalardıń orınlanıwın támiyinlew jáne juwapker xızmetkerlerdiń kónlikpelerin arttırıwdı maqset etkenligin atap ótti.

Ilajda instituttıń úlken yuristkonsultı Baxıtgúl Arzieva «Korrupciyaǵa qarsı gúresiw haqqında», «Mápler soqlıǵısıwı haqqında» jáne «Fizikalıq hám yuridikalıq shaxslardıń múrájatları haqqında»ǵı Ózbekstan Respublikasınıń Nızamları, olardıń mazmunı hám áhmiyeti, jumıs procesinde usı normativlik-huqıqıy hújjetlerden paydalanıw ózgeshelikleri haqqında tolıq maǵlıwmatlar berdi.

Lawazımlı hám juwapkerli adamlardıń óz wákilliklerinen, huqıq hám máplerinen óz maqseti jolında nızamǵa qayshı túrde paydalanıwı, jámiyettegi ornatılǵan tártip-qaǵıydalar hám morallıq normalardı buzǵan halda háreket etiwi korrupciyalıq háreketlerdiń tiykarı bolıp xızmet etedi.

Seminar dawamında bayanatshı elimizde jámiyetlik-siyasiy, social-ekonomikalıq tarawlardıń rawajlanıwına keri tásir etip atırǵan korrupciyalıq háreketlerdiń aldın alıw maqsetinde 2017-jıl 3-yanvarda qabıl etilgen «Korrupciyaǵa qarsı gúresiw haqqında»ǵı, sonday-aq, Prezidentimiz tárepinen usı jıldıń 5-iyun kúni tastıyıqlanǵan «Mápler soqlıǵısıwı haqqında»ǵı Ózbekstan Respublikasınıń nızamları, olardan kelip shıǵıp tarawlarda, ásirese, bilimlendiriw tarawındaǵı usınday háreketlerdiń aldın alıw boyınsha ámelge asırılıp atırǵan jumıslar, aldaǵı wazıypalarǵa toqtalıp ótti.

Sonday-aq, seminarda «Fizikalıq hám yuridikalıq shaxslardıń múrájatları haqqında»ǵı Ózbekstan Respublikasınıń Nızamına muwapıq, instituttıń juwapker qánigeleri arza, usınıs hám shaǵım tiykarında múrájat etiwshilerdiń múrájatların tiyisli tártipte qabıllap alıw, kórip shıǵıw hám juwap qaytarıw boyınsha bilim hám kónlikpelerin bekkemledi.

NMPI baspasóz xızmeti.