Búgin, 13-yanvar kúni Ájiniyaz atındaǵı Nókis mámleketlik pedagogikalıq institutı rektorı Quvondiq Qodirov Súwretlew óneri hám texnologiyalıq tálim fakultetinde studentlerdiń teoriyalıq bilim hám kónlikpelerin bekkemlewge xızmet etip atırǵan oqıw-óndirislik ustaxanalarınıń jumısların kózden ótkerdi.

Ilajǵa oqıw isleri hám qarjı ekonomika boyınsha prorektorlar, fakultet basshıları hám kafedra baslıqları qatnastı.

Texnologiyalıq tálim kafedrasınıń oqıw ustaxanası 2024-jılı Islam rawajlanıw bankiniń 70 mıń dollarlıq qarjıları esabınan zamanagóy ásbap-úskeneleri menen támiyinlengen edi. Házirgi waqıtta bul jerde 4 ustaxana – aspazlıq, temirge islew beriw, aǵashqa islew beriw ustaxanaları hám tigiwshilik xanası jumıs alıp barmaqta.

Bul oqıw ustaxanalarında studentler oqıw hám sabaqtan tıs waqıtlarda dógerek jumıslarında tájiriybeli ustazlarınan hár qıylı kásip-óner sırların úyrenip kelmekte.

Institut rektorı kafedra baslıǵı hám tiyisli juwapkerler menen sáwbetlesip, bul ustaxanalardıń jumısların ele de rawajlandırıw, ishki hám sırtqı buyırtpashılar menen birge islesiw nátiyjesinde qarjılandırıw sistemasın jolǵa qoyıw, ustaxanalarda qosımsha qolaylıqlar jaratıw boyınsha tapsırmalar berdi.

NMPI baspasóz xızmeti.