Prezident Shavkat Mirziyoyev 22-yanvar kúni joqarı bilimlendiriw hám ilim tarawındaǵı baslı wazıypalarǵa arnalǵan prezentaciya menen tanıstı.

2024-jıldıń 20-iyun kúni bolıp ótken videoselektor jıynalısında mámleketimiz basshısı hár bir aymaqta texnikalıq joqarı oqıw ornı hám aldınǵı injenerlik mekteplerin shólkemlestiriw wazıypasın júklegen edi. Búgingi kúnge shekem Termiz, Ándijan hám Qarshıda texnika universitetleriniń jumısları jolǵa qoyıldı. Sonday-aq, 8 injenerlik mektebi ashıldı.

Jıynalısta Nókis, Buxara, Ferǵana hám Namangan texnika universitetlerin shólkemlestiriw joybarları tanıstırıldı. Oǵan bola, jańa baǵdarlar ashılıp, sırt el baǵdarlamaları engiziledi, studentlerdiń ilimiy-innovaciyalıq processlerde qatnasıwı keńeytiledi, joqarı oqıw orınlarına sanaat birge islesiwshileri biriktiriledi.

Ulıwma usı baǵdardaǵı 35 mákemeni keńeytiw esabınan 22 texnika universiteti shólkemlestiriledi. Usı jıldıń sońına shekem jáne 17 injenerlik mektebi ashıladı.