Búgin, 25-yanvar kúni Ájiniyaz atındaǵı Nókis mámleketlik pedagogikalıq institutınıń barlıq fakultetlerinde ashıq esikler kúni ilajı sheńberinde studentlerdiń ata-anaları menen ushırasıwlar shólkemlestirildi.

Fizika-matematika fakultetinde ótkerilgen usınday ilajda rektorat wákilleri, fakultet dekanı hám tiyisli juwapkerler institutta jaslardıń oqıwı, bilim alıwı, alıs aymaqlardan kelgen studentler ushın turaq jay menen támiyinlew, olardıń qábiletlerin júzege shıǵarıw, bos waqıtların mazmunlı ótkeriw ushın jaratılǵan sharayatlar, «4+2» formatındaǵı ámeliyat barısı, oqıw procesinde korrupciyalıq jaǵdaylardıń aldın alıw boyınsha ámelge asırılıp atırǵan jumıslar tuwralı keń túrde maǵlıwmatlar berildi.

Ata-analardıń pikir-usınısları tıńlanıp, sorawlarına juwaplar berildi. Olar menen birgelikte jaslardıń tálim-tárbiyası baǵdarında bunnan bılay da tıǵız birge islesiw boyınsha aldaǵı wazıypalar belgilep alındı.

Sonday-aq, ushırasıw sheńberinde oqıwda hám jámiyetlik jumıslarda belsendilik kórsetip kiyatırǵan studentler hám olardıń ata-analarına alǵısnama jáne minnetdarshılıq xatları tapsırıldı.

Institutta ashıq esikler kúni ilajı sheńberindegi ata-analar menen ushırasıwlar 26-yanvar kúni de dawam etedi.

NMPI baspasóz xızmeti.