Búgin, 8-fevral kúni Ájiniyaz atındaǵı Nókis mámleketlik pedagogikalıq institutında studentlerdiń bos waqıtların mazmunlı ótkeriw, qábiletli, ziyrek jaslardı anıqlaw, olardıń ruwxıy dúnyasın bayıtıw hám talantlı jaslardı xoshametlew maqsetinde fakultetler arasında «Quwnaqlar hám ziyrekler» tańlawınıń final basqıshı bolıp ótti.

Finalda tańlawdıń birinshi basqıshında jeńimpaz dep tabılǵan hám finalǵa jollama alǵan:

Baslawısh tálim fakultetiniń «Baslawıshtıń juldızları»;
Pedagogika fakultetiniń «Dembermes»;
Mektepke shekemgi tálim fakultetiniń «Qarekeńniń qızları»;
Tariyx fakultetiniń «Wa-ha-ha»;
Shet tilleri fakultetiniń «Interfak»;
Dene mádeniyatı fakultetiniń «Zamdekannıń balaları» komandaları qatnastı.

Final basqıshında qatnasıwshılar ulıwma 2 shárt: «Mınaw ne degen imkaniyat» atamasındaǵı tanıstırıw hám «Juldızlı kórinis» shártleri tiykarında óz saxnalıq sheberliklerin kórsetti.

Solay etip, «Quwnaqlar hám ziyrekler» tańlawında Dene mádeniyatı fakultetiniń «Zamdekannıń balaları» komandası 1-orındı iyelep, jeńimpaz dep tabıldı hám olarǵa diplom, kóshpeli kubok, sonday-aq, komanda aǵzalarınıń hár birine bazalıq stipendiya muǵdarınıń 3 esesi muǵdarında aqshalay sıylıq vaucheri tapsırıldı.

Tańlawda Shet tilleri fakultetiniń «Interfak» komandası 2-orındı iyelep, diplom hám komanda aǵzalarınıń hár biri bazalıq stipendiya muǵdarınıń 2 esesi muǵdarında, al Tariyx fakultetiniń «Wa-ha-ha» komandası sıylı 3-orındı iyelep, diplom hám komanda aǵzalarınıń hár biri bazalıq stipendiya muǵdarınıń 1 esesi muǵdarında sıylıqlandı.

«Quwnaqlar hám ziyrekler» tańlawında qatnasıwshılar qosımsha nominaciyalar menen de sıylıqlandı. Pedagogika fakultetiniń «Dembermes» komandasınıń aǵzası Ernazar Qarataev «Eń shoq jigit» nominaciyası, Baslawısh tálim fakultetiniń «Baslawıshtıń juldızları» komandasınıń sárdarı Ulzada Umirbaeva «Eń shoq qız» nominaciyasınıń jeńimpazı dep tabılǵan bolsa, Tariyx fakultetiniń «Wa-ha-ha» komandasına «Qalqan» jámiyetlik toparı haqqındaǵı eń jaqsı háziller ushın topar atınan 1 000 000 sum muǵdarında sıylıq vaucheri tapsırıldı.

Tańlaw juwmaǵında instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov, instituttıń «Turan» komandasınıń veteran aǵzaları sózge shıǵıp, barlıq qatnasıwshılarǵa minnetdarshılıq bildirdi hám aldaǵı oqıwlarında, usınday tańlawlarda joqarı nátiyjelerge erisiwin tiledi.

«Quwnaqlar hám ziyrekler» tańlawınıń final basqıshı usınday joqarı notada óz juwmaǵına jetti.

NMPI baspasóz xızmeti.