Ájiniyaz atındaǵı Nókis mámleketlik pedagogikalıq institutı Mektepke shekemgi tálim fakulteti tárepinen Ózbekstan hám Qaraqalpaqstan xalıq shayırı Tilewbergen Jumamuratovtıń tuwılǵanına 110 jıl tolıwına arnalǵan «Teńiz tolqınınday tuwlaǵan talant» atamasındaǵı ádebiy keshe ótkerildi.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov basqarıp bardı.

Ádebiy keshege Tilewbergen Jumamuratovtıń qızı, belgili shayır, Qaraqalpaq mámleketlik universiteti jurnalistika kafedrasınıń professorı Malika Jumamuratova, instituttıń málimleme-resurs orayı sırt el málimleme-kitapxana resursları menen islesiw bóliminiń baslıǵı Rita Amanbaeva, Mektepke shekemgi tálim fakulteti jámááti hám student-jaslar qatnastı.

Keshede sózge shıqqanlar belgili sóz zergeri Tilewbergen Jumamuratovtıń oǵada bay dóretiwshiligi, atap aytqanda, poeziyalıq, prozalıq, dramalıq hám publicistikalıq janrlarda qálem terbetip, ádebiyatımızdı dúnya xalıqlarına tanıtqanlıǵı hám keleshek áwladlarǵa biybaha miyras qaldırǵanlıǵı haqqında maǵlıwmatlar berdi.

Ádebiy keshe talantlı studentler atqarıwındaǵı kórkem-ádebiy bólim menen dawam etti.

NMPI baspasóz xızmeti.