Ájiniyaz atındaǵı Nókis mámleketlik pedagogikalıq institutında 25-fevral – Júweri gúrtik kúnine arnalǵan bayram ilajları dawam etpekte.

Instituttıń 1-sanlı studentler turaq jayında hayal-qızlar másláhát keńesi baslaması menen pedagog-tárbiyashı Muhabbat apa Abdimuratova basshılıǵında «Júweri gúrtik festivalı» shólkemlestirildi.

Festivalda barlıq fakultetlerdiń student-qızları qaraqalpaq xalqınıń milliy taǵamı esaplanǵan júweri gúrtik tayarlaw boyınsha ózleriniń aspazlıq sheberliklerin kórsetiwge háreket etti.

– Bul haqıyqıy mánidegi doslıq festivalına aylandı, desem qátelespegen bolaman. Óytkeni, jataqxanamızda 576 student-qız jasaydı. Olar arasında onnan aslam millet wákilleri bar. Búgin olar júweri gúrtik tayarlaw ushın jámlesip, awızbirshilikte taǵam tayarladı. Álbette, bul jaslarımızǵa joqarı kóterińki keypiyat inám etti, – deydi pedagog-tárbiyashı Muhabbat apa.

Festival juwmaǵında barlıq qatnasıwshılarǵa institut kásiplik awqamı komiteti tárepinen tayarlanǵan sawǵalar tapsırıldı.

NMPI baspasóz xızmeti.