Ájiniyaz atındaǵı Nókis mámleketlik pedagogikalıq institutı rektorı Quvondiq Qodirov xızmet saparı sheńberinde Qazaqstan Respublikasınıń eń abıroylı joqarı oqıw orınlarınıń biri – Ál-Farabiy atındaǵı Qazaq milliy universitetinde boldı.

Universitettiń Basqarma Baslıǵı – Rektor Janseyit Túymebaev penen bolıp ótken ushırasıwda sońǵı jıllarda Ózbekstan hám Qazaqstan arasında sawda-ekonomikalıq, mádeniy-gumanitar, investiciyalıq baylanıslar menen bir qatarda bilimlendiriw tarawında birge islesiwler jańa basqıshqa kóterilgeni ayrıqsha atap ótildi.

Álbette, joqarı bilimlendiriw hám ilimiy-izertlewler baǵdarındaǵı baylanıslardı bunnan bılay da jetilistiriw hám bekkemlew, óz ara tájiriybe almasıw – búgingi kúnniń baslı máseleleriniń birinen esaplanadı.

Eki joqarı oqıw ornı basshıları birge islesiwdi ele de rawajlandırıw zárúrligin atap ótip:

– akademiyalıq mobillik;
– eki diplomlı qospa bilimlendiriw baǵdarlamaların jolǵa qoyıw;
– professor-oqıtıwshılardıń qánigeligin jetilistiriw;
– institutta Ál-Farabiy universitetiniń filialın ashıw;
– xalıqaralıq hám jergilikli grant joybarlarına qatnasıwda professor-oqıtıwshılardıń birgelikte jumıs alıp barıwı sıyaqlı máseleler boyınsha aldaǵı ámelge asırılatuǵın jumıslar haqqında sáwbetlesti.

Ushırasıwda eki joqarı oqıw ornı arasında birge islesiw boyınsha memorandumǵa qol qoyıldı.

Ál-Farabiy universiteti rektorı Janseyit Túymebaev dúzilgen memorandum eki joqarı oqıw ornı arasındaǵı birge islesiwdiń jańa baǵdarı ekenligin atap ótip, aldaǵı waqıtlarda ilimiy-pedagogikalıq baǵdardaǵı jumıslardı bekkemlewge tiykar bolatuǵınlıǵına isenim bildirdi.

Óz gezeginde, institut rektorı Quvondiq Qodirov joqarı dárejede húrmet kórsetkeni ushın universitet rektorına minnetdarshılıq bildirip, birgelikte ámelge asırılatuǵın jumıslar eki joqarı oqıw ornınıń da rawajlanıwına xızmet etetuǵınlıǵın atap ótti.

Ushırasıw dawamında tárepler bildirilgen pikir-usınıslardı nátiyjeli ámelge asırıw boyınsha birgelikte islenetuǵın jumıslardı belgilep aldı.

NMPI baspasóz xızmeti.