Ájiniyaz atındaǵı Nókis mámleketlik pedagogikalıq institutında Ózbekstan Respublikası Oliy Majlisi Nızamshılıq palatasınıń deputatı, Jaslar máseleleri boyınsha komissiya baslıǵı Shaxnoza Joldasova hám institut belsendi student-jaslarınıń ushırasıwı bolıp ótti.

Ushırasıwda deputat jaslarǵa Ózbekstan Respublikası Prezidenti Shavkat Mirziyoevtiń usı jıldıń 14-fevral kúni elimiz jasları menen bolıp ótken sáwbetlesiwi, ushırasıwda jaslar menen islesiwdiń nátiyjeliligin bunnan bılay da arttırıw, olarǵa ele de keń imkaniyatlar jaratıw ilajları dodalanıp, belsendi jaslardıń usınısları tıńlanǵanı haqqında maǵlıwmat berdi.

Sonıń menen birge, elimizde jaslarǵa baylanıslı mámleketlik siyasattıń baslı baǵdarları, sońǵı jıllarda qaraqalpaqstanlı jaslar ushın qaratılıp atırǵan itibar hám ǵamqorlıqlar, bilimli, ziyrek, qábiletli jaslardı anıqlaw maqsetinde ámelge asırılıp atırǵan jumıslar haqqında pikir almasıldı.

Jaslar deputatqa Oliy Majlis Nızamshılıq palatasında normativlik-huqıqıy hújjetlerdi qabıl etiw procesi, jaslardıń pikir-usınısları tiykarında jolǵa qoyılıp atırǵan joybarlar tuwralı ózlerin qızıqtırǵan sorawlarına juwaplar aldı.

NMPI baspasóz xızmeti.