Ájiniyaz atındaǵı Nókis mámleketlik pedagogikalıq institutı tárepinen respublikamızdıń Bozataw, Shımbay hám Ellikqala rayonlarında jasaytuǵın kem támiyinlengen hám kámbaǵal shańaraqlardıń pitkeriwshi klasslarda oqıp atırǵan perzentleri ushın biypul tayarlıq kursları shólkemlestirildi.

Usı maqsette dáslep joqarıda atap ótilgen rayonlarda jasaytuǵın, Ózbekstan Respublikası Prezidenti janındaǵı Sociallıq qorǵaw milliy agentliginiń «Kámbaǵal shańaraqlar reestri»ne kirgizilgen shańaraqlardıń 17-19 jastaǵı perzentleri haqqındaǵı maǵlıwmatları tiykarında Mektepke shekemgi hám mektep bilimlendiriw ministrligi menen birgelikte tayarlıq kursına qamtıp alınatuǵın pitkeriwshi klass oqıwshılarınıń dizimi islep shıǵıldı.

Dizim tiykarında ulıwma úsh rayondaǵı 92 usınday shańaraqlardıń perzentleri menen individual baylanıs ornatılıp, oqıwshı-jaslardıń qaysı pán boyınsha tayarlıq kursında oqıwǵa zárúrligi bar ekenligi anıqlandı hám shólkemlestiriw jumısları alıp barıldı. Bunıń ushın hár bir rayonǵa institut professor-oqıtıwshılarınan tiyisli juwapkerler biriktirildi.

Solay etip, Bozataw rayonındaǵı qánigelestirilgen mektepte, Shımbay rayonındaǵı 14-, 36-, 38-, 40-sanlı hám qánigelestirilgen mektepte, Ellikqala rayonındaǵı instituttıń pedagogika fakultetinde biypul tayarlıq kursları jumıs basladı.

Tiyisli kafedralardıń basshıları tárepinen tayarlıq kursları ushın ulıwma bilim beriw pánleri boyınsha oqıw baǵdarlamaları islep shıǵıldı hám tastıyıqlandı.

Instituttıń bir qatar professor-oqıtıwshıları belgilengen rayonlarda oqıwshılar ushın tayarlıq kursların ótip keldi. Sonıń menen birge, hár bir rayonda háptesine eki márteden tayarlıq kursın dawam ettiriw maqsetinde joqarı qánigeli ulıwma bilim beriw pánleriniń muǵallimleri shártnama tiykarında oqıwshılarǵa bilim bermekte. Olarǵa institut esabınan saatlar kesiminde miynet haqı tólew jolǵa qoyıldı.

NMPI baspasóz xızmeti.