Búgin, 4-mart kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Prezidenti janındaǵı Mámleketlik xızmetti rawajlandırıw agentligi Qaraqalpaqstan Respublikası filialı tárepinen «Innovator, lider hayallar menen mámleketlik puqaralıq xızmetti rawajlandırıw jolında» atamasındaǵı seminar shólkemlestirildi.

Ilajǵa respublikamızdaǵı mámleketlik basqarıw uyımları hám shólkemlerde jumıs islep atırǵan basshı hayal-qızlar qatnastı.

Seminarda filial baslıǵı A.Reimbaev hám agentliktiń basqarma baslıǵı D.Mahkamova sózge shıǵıp, elimizde hayal-qızlardıń mámleketlik basqarıw hám jámiyetlik turmısta, shańaraqtaǵı roli jáne belsendiligin arttırıw baǵdarında ámelge asırılıp atırǵan reformalardıń áhmiyeti haqqında aytıp ótti.

Seminar dawamında Qaraqalpaqstan Respublikası Ministrler Keńesi Baslıǵınıń orınbasarı – Shańaraq hám hayal-qızlar komitetiniń baslıǵı M.Ahmedova, Qaraqalpaqstan Respublikası Ekologiya, qorshaǵan ortalıqtı qorǵaw hám klimat ózgeriwi ministri L.Seytova hám basqa da mámleketlik basqarıw tarawında jumıs alıp barıp atırǵan, joqarı nátiyjelerge erisken hayal-qızlar mámleketlik xızmetlerde hayal-qızlardıń ornı, olardıń belsendiligin arttırıw, jetekshilik, xalıqshıllıq, kreativlik qatnas kónlikpelerin qáliplestiriw boyınsha keń túrde maǵlıwmatlar berdi hám óz tájiriybeleri menen bólisti.

Seminar bes sekciya boyınsha óz jumısın dawam ettirdi.

NMPI baspasóz xızmeti.