Ájiniyaz atındaǵı Nókis mámleketlik pedagogikalıq institutı málimleme-resurs orayında bakalavriattıń pedagogika, qaraqalpaq tili hám ádebiyatı tálim baǵdarlarınıń studentleri ushın «Ulıwma pedagogika (2-modul)» hám «Ulıwma pedagogika (3-modul Pedagogikalıq sheberlik)» sabaqlıqları, sonday-aq, imkaniyatı sheklengen oqıwshılar hám olardı mektep bilimlendiriw tarawına qamtıwǵa baylanıslı baspadan shıǵarılǵan «Inklyuziv tálim» oqıw qollanbasınıń prezentaciya keshesi bolıp ótti.

Ilajǵa málimleme-resurs orayınıń ilimiy-metodikalıq hám maǵlıwmatlar bóliminiń baslıǵı Zlixa Qaynarova, ulıwma pedagogika hám psixologiya kafedrasınıń baslıǵı, pedagogika ilimleriniń doktorı, professor Tájibay Ótebaev, pedagogika ilimleriniń doktorı, docent Gúlbáhár Bekimbetova, sonday-aq, professor-oqıtıwshılar hám student-jaslar qatnastı.

Pedagogika, qaraqalpaq tili hám ádebiyatı tálim baǵdarlarınıń studentleri ushın tayarlanǵan «Ulıwma pedagogika (2-modul)» sabaklıǵı G.Bekimbetova, D.Seytqasımov, T.Ótebaev, al «Ulıwma pedagogika (3-modul Pedagogikalıq sheberlik)» sabaqlıǵı bolsa G.Bekimbetova, D.Seytqasımov, A.Temirbekovalardıń avtorlıǵında baspadan shıǵarılǵan bolıp, studentler ushın pedagogika pániniń tariyxıy rawajlanıwı, rawajlanıw tendenciyaları, bilimlendiriwde innovaciyalıq usıllardan paydalanıw, jáhán pedagogikasınıń tájiriybesin qollanǵan halda oqıtıwda aldınǵı jáne zamanagóy málimleme-kommunikaciyalıq texnologiyalardı engiziw, sonıń menen birge, oqıw-tárbiyalıq processlerdi basqarıwda oqıtıwshı menen tárbiyashınıń óz kásibine milliy-ruwxıy jaqtan qatnası máseleleri haqqında sóz etilgen.

Sonday-aq, jańadan baspadan shıǵarılǵan «Inklyuziv tálim» oqıw qollanbası dúnya tájiriybesin úyreniw hám mámleketimizde integraciyalasqan, inklyuziv bilimlendiriw sistemasın engiziw boyınsha ámelge asırılıp atırǵan ilimiy-ámeliy izleniwlerdi ózinde jámlegen.

Bul oqıw qollanbadan imkaniyatı sheklengen balalardıń inklyuziv bilimlendiriwi, yaǵnıy ulıwma bilim beriw sistemasında oqıtıwdıń mazmunı, tiykarǵı principleri, talapları hám onıń mazmunı, tariyxı, Ózbekstanda usı bilimlendiriw sistemasın engiziw baǵdarındaǵı ámelge asırılıp atırǵan jumıslar, sonıń menen birge, inklyuziv bilimlendiriw jolǵa qoyılǵan bilimlendiriw mákemeleriniń pedagogları ushın sabaq hám shınıǵıwlardıń islenbeleri, individual baǵdarlamalar menen islew usılları hám basqa da zárúr bolǵan materiallar orın alǵan.

Sózge shıqqanlar inklyuziv bilimlendiriwdiń búgingi kúnlegi áhmiyeti tuwralı aytıp ótip, oqıw qollanbasın aldaǵı waqıtlarda sabaqlıq etip baspaǵa usınıw boyınsha ámeliy jumıslar alıp barılıp atırǵanın atap ótti.

Atap ótilgen sabaqlıqlar hám oqıw qollanba qaraqalpaq tilinde bilim alıp atırǵan studentler jáne tarawda jumıs islep atırǵan pedagoglar ushın úlken áhmiyetke iye boldı.

Prezentaciya keshesinde avtorlar jańadan baspadan shıǵarılǵan kitaplardı qatnasıwshılarǵa tanıstırıp, olardıń mazmunı hám áhmiyeti haqqında tolıq maǵlıwmatlar berildi.

Ilaj sońında jańa kitaplar studentler hám professor-oqıtıwshılar paydalanıwı ushın instituttıń málimleme-resurs orayı fondına tapsırıldı.

NMPI baspasóz xızmeti.