Assalawma áleykum, húrmetli professor-oqıtıwshılar, qádirli student-jaslar, áziz watanlaslar!

Sizlerdi hám sizler arqalı barlıq xalqımızdı ulıstıń ullı kúni, shıǵıs xalıqlarınıń jańalanıw hám jasarıw áyyamı, mıń jıllardan berli ruwxıy turmısımızdıń ajıralmas bólegine aylanǵan – Nawrız bayramı menen shın júrekten qutlıqlayman!

Hámmemiz gúwası bolıp turǵanımızday, birneshe kúnlerden berli elimiz boylap Nawrız ulıwma xalıqlıq bayramı «Qádiriyatlarıń máńgi bolsın, Nawrız!» súreni tiykarında ózgeshe kóterińkilik, joqarı shólkemleskenlik penen belgilenbekte. Bayram qarsańında ana tábiyatımız oyanıp, xalqımızdıń kewillerine sheksiz quwanısh, zawıq hám jańa úmitler baǵıshlamaqta.

Nawrız – jańa kún, jańa máwsimniń baslanıwı esaplanıp, danıshpan xalqımız hár qashan jıl basın iygilikli niyetler, úlken maqsetler hám úmitler menen qarsı aladı.

Búgingi kúnde institutımızda 17 mıńnan aslam jaslar tálim-tárbiya almaqta. Bıyılǵı «Qorshaǵan ortalıqtı qorǵaw hám «jasıl ekonomika» jılı»nda biz ilimiy-pedagogikalıq jumıslardıń nátiyjeliligin arttırıw arqalı Úshinshi Renessanstıń tırnaǵın qalaytuǵın bilimli, ilimiy potencialı joqarı, analitikalıq hám kreativ pikirleytuǵın jaslardı tárbiyalawday aldımızǵa belgilep alǵan joqarı maqsetlerimizdi, álbette, sizler menen birgelikte ámelge asıramız.

Jaslardı ana Watanǵa muhabbat hám súyispenshilik ruwxında tárbiyalaw, bilim beriwdiń sapasın arttırıw maqsetinde oqıtıwdıń jańa pedagogikalıq texnologiyaların engiziw, studentlerdiń bilimlerin bekkemlew ushın oqıw hám ámeliyat procesiniń birligin támiyinlew, jańa zamanagóy laboratoriyalıq úskenelerdi alıp keliw, ilimiy-izertlew jumıslarınıń nátiyjelerin ámeliyatqa keńnen engiziw, professor-oqıtıwshılardıń tájiriybesin arttırıw, oqıw procesine abıraylı sırt el joqarı oqıw orınları hám ilimiy oraylarınıń professorların shaqırıw sıyaqlı úlgili jumıslarımızdı bunnan bılay da dawam ettiremiz.

Bul muqaddes bayram hár birimizdi neshshe júz jıllardan berli áwladtan-áwladqa miyras bolıp kiyatırǵan milliy dástúr hám qádiriyatlarımızdı qásterlew, ullı tariyxımızdı ańlaw, dúnya tán alǵan danıshpan ata-babalarımızdıń múnásip dawamshıları bolıwday joqarı sezimlerge bóleydi.

Usınday qutlı sánede jáne bir márte siz, áziz watanlaslarımızdı jaqsılıqtıń jarshısı, shıǵıs xalıqlarınıń jańa jıl bası, ulıstıń ullı kúni – Nawrız bayramı menen qutlıqlay otırıp, elimizge tınıshlıq, paraxatshılıq, xalqımızǵa abadanlıq, qut-bereket, shańaraqlarıńızǵa amanlıq, mol ırısqı-nesiybe, jumıslarıńızǵa úlken tabıslar tileymen!

Hár kúnimiz Nawrız bolsın!

Sheksiz húrmet penen,

Quvondiq Qodirov,

Ájiniyaz atındaǵı Nókis mámleketlik pedagogikalıq institutı rektorı.