Hár qanday mámlekettiń jedel rawajlanıwı, belgili bir jetiskenliklerge erisiwi, xalıqtıń abadan turmısta jasawı sol mámlekette jaslar tálim-tárbiyası hám keleshegine beriletuǵın itibar dárejesi menen baylanıslı. Sonlıqtan, Ózbekstanda jaslar máselesi mámleketlik siyasattıń baslı baǵdarlarınıń biri bolıp tabıladı.

Búgin, 16-aprel kúni Ájiniyaz atındaǵı Nókis mámleketlik institutında Ózbekstan Xalıq demokratiyalıq partiyası Qaraqalpaqstan Respublikalıq Keńesi hám Xalıq deputatları Nókis qalalıq Keńesi tárepinen jaslar menen ashıq pikirlesiw, olardıń siyasiy bilimlerin arttırıw maqsetinde «Deputat hám jaslar» atamasında ushırasıw ótkerildi.

Ushırasıwǵa partiyanıń juwaplı xızmetkerleri, institut student-jasları, partiyadan saylanǵan deputatlar, «Jaslar qanatı» aǵzaları hám ǵalaba xabar quralları wákilleri qatnastı.

Ilajdı ótkeriwden tiykarǵı maqset deputatlar hám jaslardıń pikirlesiwin shólkemlestiriw, jaslardı nızam dóretiwshiligi procesine keń qamtıp alıw, olardıń baslamaların hám usınısların qollap-quwatlaw, jaslardıń siyasiy kónlikpelerin rawajlandırıw, partiya qatarına tartıw, sonday-aq, partiyanıń baǵdarlamalıq maqset hám wazıypaların túsindiriwden ibarat.

Ilajdı partiyanıń Qaraqalpaqstan Respublikalıq Keńesi bólim baslıǵı Nurlan Kıshanov kiris sózi menen ashıp berdi hám alıp bardı.

Ushırasıwda Ózbekstan Ózbekstan Xalıq demokratiyalıq partiyası Qaraqalpaqstan Respublikalıq Keńesi baslıǵınıń orınbasarı Maxmud Esengeldiev búgingi kúnde elimizde alıp barılıp atırǵan keń kólemli reformalar, sonıń ishinde, jaslarǵa jaratılıp atırǵan múmkinshilikler, olardıń óz baslamaların júzege shıǵarıwı ushın jaratılǵan sharayatlar haqqında, sonıń menen birge, partiyanıń baǵdarlamalıq maqset hám wazıypaların úgit-násiyat etiwde partiya shólkemleri hám deputatlar tárepinen alıp barılıp atırǵan jumıslar jáne partiyanıń jaslar menen islesiw baǵdarındaǵı jumıslarına toqtap ótti.

Sonıń menen birge, Xalıq deputatları Nókis qalalıq Keńesindegi ÓzXDP deputatlıq toparı aǵzası Qutlımurat Qalxorazov mámleketimizde jaslar ushın jaratılıp atırǵan sharayatlar, múmkinshilikler hám jeńillikler haqqında keńnen túsinikler berdi.

Ushırasıwda partiya qatarına jańadan qabıl etilgen bir qatar jaslarǵa aǵzalıq gúwalıqları tapsırıldı.

Ilaj dawamında jaslardı qollap-quwatlaw, olardıń máplerin qorǵaw boyınsha pikir-usınıslar bildirilip, qatnasıwshılar ózleriniń qızıqtırǵan sorawlarına juwaplar aldı.

NMPI baspasóz xızmeti.