Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinde 1-aprel – Xalıqaralıq quslar kúni múnásibeti menen «Quslardı qorǵayıq» atamasındaǵı bayram keshesi bolıp ótti.

Keshede instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov sózge shıǵıp, ana tábiyatımızda, elimizdiń biologiyalıq kóp túrliliginde quslardıń ornı, olardı qorǵaw, sonıń menen birge, bul sáneniń tariyxı, dúnya mámleketlerinde belgileniwi haqqında áhmiyetli maǵlıwmatlardı aytıp ótti.

Quslardı qorǵawǵa baǵdarlanǵan sáne birinshi márte 1894-jılı AQShtıń Pensilvaniya shtatındaǵı Oil-Siti qalasındaǵı mektep oqıwshıları tárepinen belgilengen bolsa, keyin ala ótken ásirdiń baslarınan dúnyanıń kóplegen mámleketlerinde belgilene baslaǵan.

Xalıqaralıq ornitologlar awqamınıń sońǵı maǵlıwmatlarına qaraǵanda dúnyada 11 mıńnan aslam qus túri dizimge alınǵan bolsa, 1500-jıldan házirgi kúnge shekem antropogen tásirler aqıbetinde 160 túr ulıwma joq bolıp ketken. Búgingi kúnde 1200 qus túri joq bolıp ketiw qáwpi astında qalmaqta.

Qaraqalpaqstan Respublikası faunasında quslardıń 319 túri dizimge alınǵan bolıp, sonnan 45 túr Ózbekstan Respublikasınıń Qızıl kitabına kirgizilgen. Xalıqaralıq tábiyattı qorǵaw awqamınıń Qızıl dizimine bolsa elimizdegi quslardıń 46 túri kirgizilgen.

Quslar – biziń tábiyattaǵı eń jaqın dostımız. Olardıń túrlerin saqlap qalıw, kóbeytiw ushın jaslarımız arasında usınday úgit-násiyat ilajların alıp barıwdıń áhmiyeti joqarı.

Bayram keshesi «Rebus tiykarında quslardıń atların tabıw», «Quslar haqqında qızıqlı shártlerdi orınlaw», «Quslardıń eń jaqsı kórinisin islew», «Quslar ushın uya soǵıw» sıyaqlı birneshe tańlawlar, sonıń menen birge, instituttıń «Tumaris» xalıq ansambli, fakultettiń talantlı studentleri atqarıwındaǵı koncert baǵdarlaması, qızıqlı saxnalıq kórinisler menen dawam etti.

Ilaj sońında belsene qatnasqan studentler diplom hám sawǵalar menen sıylıqlandı.

NMPI baspasóz xızmeti.