Arqa-batıs áskeriy okrugi Nókis garnizonında jaslardı watansúyiwshilik ruwxında tárbiyalaw, studentlerdiń ruwxıy hám fizikalıq tayarlıǵı, olarda Qurallı Kúshler qatarında xızmet etiwge bolǵan qızıǵıwshılıqtı arttırıw hám jaslar arasındaǵı jınayatshılıqtıń aldın alıw maqsetinde Jaslar awqamı Qaraqalpaqstan Respublikası Keńesi, Arqa-batıs áskeriy okrugi menen birgelikte joqarı oqıw orınlarındaǵı student-jaslar arasında «Alpamıs izbasarları» áskeriy-sport jarısı ótkerildi.

Jarıs qatnasıwshıları tiykarınan áskeriy xızmetke barmaǵan hám usı tarawǵa qızıǵıwshı jaslardan saylap alınǵan bolıp, ulıwma 6 shárt boyınsha óz ara bellesti.

Juwırıw estafetası, AK-74 avtomatın tolıq emes bóleklerge ajıratıw hám jıynaw, mergenlik (TIR), arqan tartıs, uzaq aralıqqa granata ılaqtırıw, tosıqlardan ótiw sıyaqlı shártlerde qatnasıwshılar óz imkaniyatların sınaqtan ótkerdi.

Qızǵın bellesiwlerge tolı ótken jarıs juwmaǵında:

1-orındı – Berdaq atındaǵı Qaraqalpaq mámleketlik universiteti;

2-orındı – Ájiniyaz atındaǵı Nókis mámleketlik pedagogikalıq institutı;

3-orındı – Qaraqalpaqstan awıl xojalıǵı hám agrotexnologiyalar institutı komandaları iyeledi.

Jarıs jeńimpazları shólkemlestiriwshiler tárepinen diplom hám estelik sawǵaları menen sıylıqlandı.

Jaslar awqamı Qaraqalpaqstan Respublikası Keńesi málimleme xızmeti.