Aldın xabar bergenimizdey, Ózbekstan Respublikası Ministrler Kabinetiniń tiyisli qararları tiykarında elimizdiń barlıq aymaqlarında usı jıldıń 21-27-aprel kúnleri aralıǵında «Ózbekstan – kitapqumarlar jurtı» súreni tiykarında Respublikalıq «Kitapqumarlıq hápteligi» ilajları shólkemlestirilmekte.

Búgin, 22-aprel kúni Ájiniyaz atındaǵı Nókis mámleketlik pedagogikalıq institutı málimleme-resurs orayında «Kitapqumarlıq hápteligi»niń ashılıw keshesi bolıp ótti.

Ilajdı oray direktorı Gúlayım Jiyemuratova basqarıp bardı.

Keshede instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov, Qaraqalpaqstan xalıq jazıwshısı, «Doslıq» ordeniniń iyesi Allanazar Abdiev, qaraqalpaq ádebiyatı kafedrasınıń docenti Qabıl Mámbetov hám basqalar sózge shıǵıp, sońǵı jılları Prezidentimizdiń arnawlı qararı tiykarında elimizde kitapqumarlıqtı keń en jaydırıw, xalıqtıń ruwxıy dúnyasın bayıtıw, jaslardı kitap oqıw hám kórkem ónerge qızıqtırıw, olardı hár tárepleme xoshametlew baǵdarında alıp barılıp atırǵan ilajlardı atap ótti hám usınday qollap-quwatlaw nátiyjesinde respublikamızdan kóplegen talantlı jasları ósip jetilisip atırǵanına ayrıqsha toqtaldı.

Maǵlıwmat ornında atap ótiw orınlı, háptelik sheńberinde bir qatar mádeniy-aǵartıwshılıq ilajları, ushırasıwlar hám ádebiy kesheler shólkemlestiriliwi belgilengen.

NMPI baspasóz xızmeti.