Búgin, 24-aprel kúni Ájiniyaz atındaǵı Nókis mámleketlik pedagogikalıq institutı Pedagogika fakultetinde Xalıqaralıq súwretlew hám ámeliy kórkem óner festivalı sheńberinde kórgizbe shólkemlestirildi.

Kórgizbeden súwretlew óneri hám injenerlik grafikası kafedrasınıń professor-oqıtıwshıları, bakalavr tálim baǵdarı studentleri, sonday-aq, súwretlew óneri hám ámeliy bezew óneri magistratura qánigeliginde oqıp atırǵan magistrantlardıń dóretiwshilik jumısları orın aldı.

Ilajdıń ashılıw máresiminde institut rektorı Quvondiq Qodirov, Ózbekstan Kórkem óner akademiyası Qaraqalpaqstan bóliminiń baslıǵı Ulbosın Utegenova, Qaraqalpaqstan xalıq xudojnigi, Ózbekstan Kórkem óner akademiyasınıń haqıyqıy aǵzası – akademik Sársenbay Baybosınov, Tashkent hám Jizzaq qalalarınan kelgen miymanlar jáne basqalar sózge shıǵıp, hár jılı ótkeriw dástúrge aylanǵan bul kórgizbeni shólkemlestiriwden baslı maqset jaslar tárepinen islengen dóretiwshilik jumısların keń jámiyetshilikke tanıstırıwdan ibarat ekenligin atap ótti.

Kórgizbege qoyılǵan jumıslar 2024-2025-oqıw jılında orınlanǵan bolıp, tiykarınan maylı hám akvarel boyawda islengen. Janrlıq ózgesheligi boyınsha peyzaj, natyurmort, portret janrları orın iyeleydi.

Sonday-aq, hár qıylı janrdaǵı kartinalar menen birgelikte zamanagóy texnologiyalar járdeminde islengen dóretiwshilik jumısları jáne ámeliy bezew óneri boyınsha túrli buyımlar, qol óneri úlgileriniń de kórgizbege qoyılǵanlıǵı ilaj qatnasıwshılarınıń dıqqatın ózine qarattı.

Ilaj sheńberinde súwretlew óneri hám injenerlik grafikası bakalavr tálim baǵdarı studentleri arasında portret hám peyzaj islew boyınsha tańlaw ótkerildi.

NMPI baspasóz xızmeti.