Aldın xabar bergenimizdey, usı jıldıń 22-23-aprel kúnleri Surxandárya wálayatınıń Termiz qalasında sporttıń WORKOUT túri boyınsha ótkerilgen «Universiada-2025» sport jarıslarınıń respublikalıq final basqıshında Qaraqalpaqstan Respublikası erler saylandı komandası 1-orındı, sonday-aq, student qızlardan dúzilgen saylandı komandamız aǵzaları sıylı 2-orındı iyelegen edi.

Búgin, 24-aprel kúni Ájiniyaz atındaǵı Nókis mámleketlik pedagogikalıq institutında tariyxıy nátiyjege erisken jeńimpaz sportshı jaslarımız hám saylandı komanda delegaciyası aǵzaları saltanatlı túrde kútip alındı.

Ilajda institut rektorı Quvondiq Qodirov, Qaraqalpaqstan Respublikası Sport ministriniń orınbasarı Azamat Qalbaev sózge shıǵıp, elimizde jaslardı sport hám salamatlıq ilajlarına keńnen tartıw, olar arasında salamat turmıs tárizin úgit-násiyatlaw, tájiriybeli sportshılardı tárbiyalap shıǵarıwǵa ayrıqsha dıqqat awdarılıp, tarawda keń kólemli reformalar ámelge asırılıp atırǵanlıǵın atap ótti. Bunıń nátiyjesinde sportshılarımızdıń Olimpiada oyınları, Aziya hám Jáhán birinshiliklerinde qolǵa kirgizip atırǵan tabısların maqtanısh penen tilge aldı.

Saltanatlı ilajda sportshılardı jarısqa tayarlaǵan Nókis mámleketlik pedagogikalıq institutı Dene mádeniyatı fakultetiniń docenti Dúysenbay Karimov sport penen shuǵıllanıp, usınday joqarı nátiyjelerge erisiw ushın zárúr sharayatlardı jaratıp berip atırǵan húrmetli Prezidentimiz, elimiz, sonday-aq, institut basshılarına saylandı komanda atınan minnetdarshılıq bildirdi.

Ilaj instituttıń talantlı studentleri atqarıwındaǵı koncert baǵdarlaması menen dawam etti.

Esletip ótemiz, saylandı komanda aǵzaları Ájiniyaz atındaǵı Nókis mámleketlik pedagogikalıq institutı, Ózbekstan mámleketlik dene tárbiya hám sport universiteti Nókis filialı hám Berdaq atındaǵı Qaraqalpaq mámleketlik universitetiniń sportshı student-jaslarınan dúzilgen.

NMPI baspasóz xızmeti.