Húrmetli, institutımızdıń maqtanıshları bolǵan student-jaslar!

Sizlerdiń sporttıń WORKOUT túri boyınsha ótkerilgen «Universiada-2025» sport jarıslarınıń respublikalıq final basqıshında qolǵa kirgizgen tariyxıy jeńisińiz xalqımız hám institutımız jámááti ushın úlken maqtanıshlı waqıya boldı.

Sport tek ǵana fizikalıq kúsh emes, sonıń menen birge, joqarı dárejedegi tártipti, shın júrekten berilip háreket etiwdi de talap etedi. Sizler bul talaplardı nátiyjeli atqarıp, ózlerińizdiń qanday qábiletli hám márt student-jaslar ekenińizdi dálilledińiz.

Respublikamızdıń erler saylandı komandası quramında institutımız studentleri Arıslanbay Zagidullinov, Umidjon Raxmonov, Sardorbek Yuldoshev, Kanatbay Davletbaev, al qızlar saylandı komandasında Gúlnaz Jaqsımuratova hám Shohista Otaboevalardıń úlesleri ayrıqsha boldı. Álbette, «Ustazı jaqsınıń ustamı jaqsı» dep dana xalqımız aytqanınday, bunday nátiyjege erisiwde tájiriybeli ustaz, institutımızdıń Dene mádeniyatı fakulteti docenti Dúysenbay Karimovtıń da pidayılıq penen etken miynetlerin ayrıqsha tolqınlanıw menen atap ótpekshimiz.

Xabarıńız bar, «Universiada» sport jarıslarında sportshı studentlerimizdiń qolǵa kirgizgen tabısları nátiyjesinde 2019- hám 2023-jıllarda institutımızǵa sport inventarlarınan ibarat Prezident sawǵaları tapsırılǵan edi.

Mine, usı dástúrdi dawam ettirgen halda búgingidey joqarı nátiyjelerge erisip atırǵan sizlerdey jaslarımız institutımızdıń sport tarawındaǵı qádiriyatların ele de bekkemleydi. Aldaǵı waqıtlarda da jańa nátiyjelerge erisip, elimizdiń bayraǵın jáhán arenalarında kóklerge kóterip júriwińiz ushın bárqulla sizlerdi qollap-quwatlaymız.

Áziz sportshı jaslar!

«Óz aldına ullı maqsetlerdi qoyǵan xalıq tek salamat hám kúshli bolǵan jaǵdayda ǵana gózlegen niyetine erise aladı. Xalqımızdıń salamat bolıwı hám ullı jumıslardı ámelge asıra alıwında dene tárbiyası hám sporttıń áhmiyeti joqarı», – dep aytqan Prezidentimizdiń ibarasın óz aldımızǵa uran etip alıp, usı tiykarda ámeliy jumıslarımızdı dawam ettire alsaq, álbette, Jańa Ózbekstan hám Jańa Qaraqalpaqstandı, Úshinshi Renessanstıń tırnaǵın birgelikte qura alamız.

Sizlerdi jáne bir márte qolǵa kirgizgen tabıslarıńız benen shın júrekten qutlıqlay otırıp, hár birińizge bekkem densawlıq, jańa jeńisler hám áwmet tileymen!

Húrmet penen,
Quvondiq Qodirov,
Ájiniyaz atındaǵı Nókis mámleketlik pedagogikalıq institutı rektorı.