Respublikamızdaǵı joqarı oqıw orınları student-jasları arasında hár jılı joqarı kóterińkilik penen ótkeriletuǵın «Studentler báhári» festivalı jaslarımızdıń ómirinde zawıqlı hám este qalarlıq waqıyalarǵa tolı ilajlardıń biri bolıp tabıladı.

Festivaldıń bıyılǵı juwmaqlawshı gala-koncerti hám saltanatlı sıylıqlaw máresimi Taxtakópir rayonı aymaǵındaǵı «Qaratereń» ekoturizm kompleksinde ótkerildi.

Saltanatlı ilajda festival sheńberinde bolıp ótken mádeniy-aǵartıwshılıq baǵdarındaǵı tańlawlar hám sport jarıslarında jeńimpaz bolǵan, sonday-aq, sıylı orınlardı iyelegen Ájiniyaz atındaǵı Nókis mámleketlik pedagogikalıq institutınıń belsendi student-jaslarına Ózbekstan Jaslar isleri agentligi Qaraqalpaqstan Respublikası basqarması tárepinen diplomlar hám sawǵalar tapsırıldı.

Bórshitaw etegindegi «Qaratereń»niń tákirarlanbas gózzal tábiyatı qushaǵında ótkerilgen ilaj jaslarımızdı jańa sheklerge qaray baǵdarlawǵa xızmet eteri sózsiz.

NMPI baspasóz xızmeti.