Ózbekstan Respublikası Mektepke shekemgi hám mektep bilimlendiriwi ministrligi tárepinen qızlardıń málimleme texnologiyaları boyınsha bilimlerin ele de arttırıw, olardı zamanagóy kásiplerge baǵdarlaw, aldınǵı ideyaların qollap-quwatlaw maqsetinde 2021-jıldan berli «Digital Generation Girls» («Sanlı áwlad qızları») joybarı turaqlı túrde ótkerilip kelinbekte.

Joybardıń 2025-jılǵı máwsimi Tashkent wálayatınıń Bostanlıq rayonındaǵı «Renessans» balalar lagerinde bolıp ótti. Respublikamızdan, sonday-aq, sırt ellerden 7 mıńnan aslam qatnasıwshılar dizimnen ótken joybardıń juwmaqlawshı basqıshına 120 dan aslam qızlar saylap alındı.

Áhmiyetlisi, olar arasında Ájiniyaz atındaǵı Nókis mámleketlik pedagogikalıq institutı Shet tilleri fakulteti inglis tili hám ádebiyatı tálim baǵdarınıń 2-kurs studenti Alfiya Amangeldieva da óziniń innovaciyalıq joybarı menen qatnastı.

Bilimlendiriw, jasalma intellekt, jasıl ekonomika hám klimat ózgeriwi sıyaqlı baǵdarlarda tańlaw formatında ótken joybardıń final basqıshında institutımız studenti Alfiya «Gidrogel járdeminde «EkoAral» jaratıw» joybarı menen jeńimpazlar qatarınan orın aldı hám qımbat bahalı sawǵalar jáne AQShqa bilimlendiriw sayaxatı jollamasın qolǵa kirgizdi.

Institutımız studenti Alfiya Amangeldievanı tabıslı nátiyjeleri menen shın júrekten qutlıqlaymız!

NMPI baspasóz xızmeti.