Ózbekstan Respublikası Prezidentiniń «Pedagog kadrlar tayarlaw sistemasın bunnan bılay da jetilistiriw ilajları haqqında»ǵı Pármanına bola, 2025-2026-oqıw jılınan pedagog kadrlar tayarlaw boyınsha:

– pedagog kadrlardı tayarlaw tek ǵana kúndizgi hám keshki bilimlendiriw túri boyınsha shólkemlestirilip, sırtqı bilimlendiriw túrine qabıllaw ámelge asırılmaydı;

– joqarı pedagogikalıq bilimlendiriw baǵdarında mámleketlik emes bilimlendiriw xızmetlerin kórsetiw tarawındaǵı jumıstı licenziyalaw Mektepke shekemgi hám mektep bilimlendiriwi ministrliginiń juwmaǵı tiykarında ámelge asırıladı.

2025-2026-oqıw jılınan sırt el qánigelerin tartqan halda Nizamiy atındaǵı Ózbekstan milliy pedagogikalıq universitetiniń xalıqaralıq bilimlendiriw baǵdarlamaları engizilgen bilimlendiriw baǵdarlarında sabaq beriw ushın professor-oqıtıwshılardı tańlap alıw sisteması jolǵa qoyıladı.

2026-2027-oqıw jılınan ayrıqsha bilimlendiriw mútájlikleri bolǵan balalarǵa tálim-tárbiya beriw sistemasın bunnan bılay da jetilistiriw maqsetinde «Gospital pedagogika» magistratura qánigeligi boyınsha kadrlar tayarlaw jolǵa qoyıladı.

2026-jıl 1-sentyabrden respublikadaǵı pedagogikalıq texnikumlardıń oqıw procesine xalıqaralıq bilimlendiriw baǵdarlamaları basqıshpa-basqısh engiziledi.