Ájiniyaz atındaǵı Nókis mámleketlik pedagogikalıq institutı hám Qaraqalpaqstan Respublikası Mektepke shekemgi hám mektep bilimlendiriw ministrligi tárepinen tastıyıqlanǵan qospa qarar tiykarında ulıwma bilim beriw mektepleriniń pitkeriwshi klass oqıwshıları arasında ximiya hám biologiya boyınsha kóp basqıshlı pán olimpiadasınıń institut basqıshı bolıp ótti.

Ózbekstan Respublikası Prezidentiniń «Ximiya hám biologiya baǵdarlarında úzliksiz bilimlendiriwdiń sapasın hám ilimniń nátiyjeliligin arttırıw ilajları haqqında»ǵı qararı tiykarında ótkerilgen olimpiadaǵa dáslep rayonlıq, sońınan Qaraqalpaqstan Respublikası basqıshında joqarı nátiyjelerge erisken 10 oqıwshı qatnastı.

Pán olimpiadasınıń institut basqıshında belgilengen reje talaplarınan kelip shıǵıp ulıwma 100 ball toplaw imkaniyatın beretuǵın bes jazba imtixan sorawları hám bir laboratoriyalıq jumıs berildi.

Oqıwshılardıń nátiyjeleri instituttıń tájiriybeli professor-oqıtıwshıları tárepinen bahalandı.

Solay etip, ximiya hám biologiya pánleri olimpiadasınıń institut basqıshında jeńimpazlar hám sıylı orın iyeleri anıqlandı hám arnawlı sertifikatlar menen sıylıqlandı.

Jeńimpaz oqıwshılar haqqındaǵı maǵlıwmatlar Joqarı bilimlendiriwdi rawajlandırıw izertlewleri hám aldınǵı texnologiyalardı engiziw orayına jiberiledi.

NMPI baspasóz xızmeti.