Ájiniyaz atındaǵı Nókis mámleketlik pedagogikalıq institutında xalqımızdıń ádiwli perzenti, elimizdiń jámiyetlik-siyasiy, sociallıq-ekonomikalıq jaqtan rawajlanıwına salmaqlı úles qosqan belgili mámleketlik hám jámiyetlik ǵayratker Pirjan Xalmuratovtıń tuwılǵanına 100 jıl tolıwına arnalǵan keshe bolıp ótti.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov alıp bardı.

Keshede Qaraqalpaqstan Respublikası Ishki isler ministriniń másláhátshisi, polkovnik Orınbay Turdaqov, institut metodisti Erniyaz Qasımov óz pidayı miynet jolı, hadallıǵı hám watansúyiwshiligi menen xalqımızdıń júrek tórinen orın alǵan Pirjan Xalmuratovtıń ómiri, xızmetleri haqqında bayanat jasadı.

Pirjan Xalmuratov 1925-jıl 1-yanvarda Qanlıkól rayonı aymaǵında dúnyaǵa keldi. Ol kishkene waqtınan óz arzıw-niyetlerin ámelge asırıw ushın ilim jolınan barıp, xalqımızdıń ádiwli xızmetine bel bayladı.

Onıń aǵartıwshılıq hám bilim jolı baslawısh mektepten Tashkent yuridikalıq institutına shekem dawam etti. Ol instituttı pitkerip kelgennen soń miynet jolın Qaraózek rayonı prokurorı lawazımınan baslaǵan bolsa, óziniń miynet súygishligi, shólkemlestiriwshilik uqıbı, joqarı bilimi hám tájiriybesi menen Qaraqalpaqstan Respublikası Ishki isler ministriniń orınbasarı, Kegeyli hám Xojeli rayonlarınıń birinshi basshısı lawazımlarında jemisli miynet etti.

Pirjan Xalmuratov prokuratura hám ishki isler uyımları tarawında xızmet etip júrgen waqıtlarında baslı itibardı keleshek iyeleri bolǵan jaslardıń tálim-tárbiyasına qaratıp, olar arasında huqıqıy sawatlılıqtı arttırıw, jınayatshılıq hám huqıqbuzarlıqlardıń aldın alıw, jaslardı hár tárepleme qollap-quwatlaw boyınsha úlgili jumıslardı alıp bardı.

Kegeyli rayonında 11 jıl hám Xojeli rayonında 12 jıl dawamında birinshi xatker lawazımda islegen jıllarında usı rayonlardı sociallıq-ekonomikalıq jaqtan rawajlandırıw arqalı xalıqtıń abadan turmısta jasawın támiyinlewge salmaqlı úles qostı.

Ásirese, Pirjan Xalmuratovtıń Xojeli rayonındaǵı basshılıq etken dáwiri tek ǵana rayon turǵınları arasında emes, sonıń menen birge, pútkil respublikamız xalqı arasında «Rawajlanıw jılları» sıpatında eske alınadı. Sol jılları rayonda jańa mektepler, emlewxanalar, kóp qabatlı turaq jaylar, baylanıs obyektleri, miymanxanalar hám basqa da infrastrukturalıq imaratlar qurıp pitkerildi. Bul obyektler elege shekem xalıqtıń iygiligi jolında xızmet etpekte. Olardı kórgen adamlar óz watanınıń shın mánidegi hadal perzenti Pirjan Xalmuratovtıń pidayı xızmetlerin eske aladı.

Keshede instituttıń nuranıy professor-oqıtıwshıları Pirjan Xalmuratovtıń miynet jolı menen baylanıslı óz eske túsiriwleri menen bólisti, sonday-aq, onıń perzentleri, shańaraq aǵzaları institut jámáátine usınday kesheni shólkemlestirgeni ushın minnetdarshılıq bildirdi.

NMPI baspasóz xızmeti.