9-may – Eslew hám qádirlew kúni múnásibeti menen Ájiniyaz atındaǵı Nókis mámleketlik pedagogikalıq institutı fakultetleriniń jámáátleri studentler menen birgelikte Ekinshi jer júzilik urıs dáwirindegi ata-babalarımızdıń mártliklerin eske alıp, olarǵa húrmet kórsetpekte.

Instituttıń Shet tilleri, Túrkiy tiller hám Tariyx fakultetleri dekanatı wákilleri, professor-oqıtıwshılar, tyutorlar hám student-jaslar paytaxtımız Nókis qalasındaǵı «Ámiwdárya» mákan puqaralar jıyını aymaǵında jasaytuǵın Ekinshi jer júzilik urıs qatnasıwshısı Qádirbay ata Narmanovtıń shańaraǵında bolıp, fashizm ústinen erisilgen jeńistiń 80 jıllıǵı menen qutlıqladı.

Jaslar Qádirbay ata menen sáwbetlesip, urıs dáwirindegi qıyınshılıqlar, búgingidey abadan turmısımızdı támiyinlewge xızmet etken ata-babalarımızdıń miynetlerin, mártliklerin eske aldı. Tınısh hám paraxat turmısımızdıń qádirine jetip, onı kóz qarashıǵınday qorǵaw úlken pidayılıq hám qaharmanlıq ekenligin jáne bir márte ańladı.

Qaharman ataǵa fakultet jámáátleri tárepinen tayarlanǵan bayram sawǵaları tapsırıldı.