Búgin, 13-may kúni Ájiniyaz atındaǵı Nókis mámleketlik pedagogikalıq institutında jer silkiniwi menen baylanıslı ayrıqsha jaǵdaylarda durıs háreketleniw hám shomılıw máwsiminde hár qıylı unamsız jaǵdaylardıń aldın alıwǵa arnalǵan ushırasıw shólkemlestirildi.

Instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı wazıypasın waqıtsha atqarıwshısı Qarjawbay Reymov alıp barǵan ushırasıwǵa Nókis qalalıq Ayrıqsha jaǵdaylar bóliminiń baslıǵı Azat Qurbanov hám bólimshe baslıǵı Javlon Turaev, instituttıń tiyisli juwapker qánigeleri hám student-jaslar qatnastı.

Ushırasıw dawamında tábiyiy apatshılıqlar, sonıń ishinde, jer silkiniwlerdiń júz beriwi, bunday jaǵdaylarda belgilengen qaǵıydalarǵa say durıs háreketleniw boyınsha zárúr kónlikpeler berildi.

Sonday-aq, jaz máwsimi kirip keliwi menen kúnler ısıp, adamlardıń hár qıylı belgilenbegen orınlarda shomılıw jaǵdayları jiyi ushırasatuǵınlıǵı, shomılıw máwsiminde qáwipsizlik qaǵıydalarına ámel etpewi, bulardıń aqıbetinde insan ómiri qáwip astında qalıwı múmkinligi haqqında turmıslıq mısallar menen túsindiriw jumısları alıp barıldı.

Kún tártibindegi atap ótilgen profilaktikalıq ilajlar boyınsha ámeliy kónlikpeler payda etiw maqsetinde videorolikler qatnasıwshılardıń názerine usınıldı.

Ushırasıw sońında student-jaslar ushın Ayrıqsha jaǵdaylar bóliminiń arnawlı qutqarıw otryadları tárepinen kórgizbe shólkemlestirilip, tarawda qollanılatuǵın hár qıylı ásbap-úskenelerdiń wazıypaları haqqında maǵlıwmat berildi.

NMPI baspasóz xızmeti.